Hydro ganja worth 29 lakhs seized from educated youth
छत्रपती संभाजीनगर, पुढारी वृत्तसेवा : शहरातील उच्चभू आणि सुशिक्षित घरातील तरुण अंमली पदार्थांच्या विळख्यात किती खोलवर अडकले आहेत, याचे धक्कादायक वास्तव पुन्हा एकदा समोर आले आहे. गुन्हे शाखेच्या पथकाने बाबा पेट्रोल पंप परिसरात सापळा रचून दोन उच्चशिक्षित तरुणांना रंगेहाथ पकडले असून, त्यांच्याकडून चक्क २८ लाख ५० हजार रुपये किमतीचा २८५ ग्रॅम हायड्रोपोनिक (हायब्रीड) गांजा जप्त केला आहे. या गांजाची किंमत प्रतिग्रॅम तब्बल १० हजार रुपये असल्याची माहिती समोर आली आहे.
ओम रवींद्र शिंदे (२३, रा. एन-४, सिडको) आणि राजवीर चरणसिंग बिराग (२०, रा. एन-४, सिडको) अशी अटकेतील आर-राजवीर बिरग ोपींची नावे आहेत. ओम हा एमबीए पदवीधर आहे, तर राजवीर संगणक अभियंता आहे. विशेष म्हणजे, दोघांच्याही कुटुंबाची पार्श्वभूमी कायद्याशी संबंधित असतानाही हे तरुण या काळ्या धंद्यात ओढले गेले आहेत.
न्यायालयाने दोघांना १३ मार्चपर्यंत पोलिस कोठडी सुनावली आहे. गुन्हे शाखेला मिळालेल्या गुप्त माहितीनुसार, लोखंडी पुलाजवळ दुचाकीवरून (एमएच-२०-एचपी-३८८१) आलेल्या या दोघांना पोलिसांनी ताब्यात घेतले. त्यांच्या झडतीत २८५ ग्रॅम हायब्रीड गांजा, डिजिटल वजन काटा आणि दोन मोबाईल असा मुद्देमाल सापडला. याप्रकरणी क्रांती चौक पोलिस ठाण्यात एनडीपीएस कायद्यानुसार गुन्हा दाखल करण्यात आला आहे.
