High-tech In-Out System at Ghati Hospital
छत्रपती संभाजीनगर, पुढारी वृत्तसेवा: गरिबांच्या घाटी रुग्णालयात अत्याधुनिक उपचार सुविधांसोबतच आता विमानतळाप्रमाणे हायटेक इन-आउट सिस्टम सुरू करण्यात येत आहे. प्रवेश करण्यासाठी ओपीडीमधून क्यू आर पास मिळणार असून, हा पास स्कॅन केल्यानंतरच सर्जिकल इमारतीमधील विविध वॉर्डामध्ये जाता येणार आहे. रुग्ण, नातेवाइकांच्या सुविधासाठी हे नियोजन करत असल्याचा दावा प्रशासनाने केला आहे.
घाटी रुग्णालयात उपचारासाठी मराठवाड्यासह खान्देश, विदर्भातूनही हजारो रुग्ण येतात. दररोजची ओपीडी दोन हजारांवर गेली असून, तेवढेच रुग्ण उपचारासाठी विविध वॉर्डात दाखल असतात. त्यामुळे घाटीत २४ तास रुग्ण-नातेवाइकांची गर्दी असते. सुमारे ७० टक्क्यांहून अधिक गर्दी ही एकट्या सर्जिकल इमारतीमध्ये दाखल रुग्णांसाठी असते. त्यामुळे अपघात विभाग तसेच आरएमओ समोरील प्रवेश गेटवर नेहमीच गर्दी होते.
ही गर्दी टाळण्यासाठी तसेच रुग्ण, नातेवाइकांच्या सुविधेसाठी क्यू आर कोड प्रवेश सिस्टम लागू करण्यात येत आहे. आरएमओ कार्यालयासमोरील सर्जिकल बिल्डिंग प्रवेशव्दाराला हायटेक इंट्री प्रमाणे लूक देण्याचे काम प्रगतिपथावर आहे. ओपीडीमधून मिळालेले क्यू आर पास स्कॅन करून प्रवेश मिळणार आहे.
