Eat food prepared in the morning by the evening; hotel owners refuse to serve hot dishes
सुनील मरकड
खुलताबाद : तालुक्यात सध्या व्यावसायिक गॅसचा तीव्र तुटवडा जाणवत असून याचा परिणाम थेट हॉटेल व्यवसायवर झाला आहे. गॅस सिलिंडर मिळण्यास विलंब होत असल्यामुळे अनेक हॉटेल चालकांनी गरमागरम पदार्थ देण्यास नकार देण्यास सुरुवात केली आहे.
काही हॉटेलमध्ये ग्राहकांना जे आहे ते घ्या आणि खा असे सांगितले जात असल्याचे चित्र दिसून येत आहे. चहा हॉटेल वाले गोल्डन चहा, कमी साखर, काळा चहा, कॉफी देण्यासाठी टाळत आहे. सकाळी एकदा तयार केलेला चहा संपत नाही तोपर्यंत गॅस परत पेटणार नाही. असे सांगून टाळत आहे. दुसरीकडे हॉटेल व्यावसायिकांनाही या परिस्थितीचा मोठा फटका बसत आहे. अनेक हॉटेल चालकांकडे एक किंवा दोनच गॅस सिलिंडरचा तुटवडा जाणवताच काहींनी चुलीवर चहा बनवण्यास सुरुवात केली आहे.
गॅस सिलिंडर उपलब्ध असल्यामुळे ते मर्यादित प्रमाणातच स्वयंपाक करत आहेत. काही हॉटेलमध्ये सकाळी तयार केलेले पदार्थ दिवसभर ग्राहकांना दिले जात आहेत, तर काही हॉटेलमध्ये गरमागरम पदार्थ देण्यास नकार देत जे उपलब्ध आहे तेच घ्या असे सांगितले जात आहे. मागील काही दिवसांपासून सुरू असलेल्या युद्धजन्य परिस्थितीमुळे इंधन पुरवठ्यावर परिणाम झाला असल्याचे सांगितले जात आहे.
याचा परिणाम एलपीजी गॅसच्या पुरवठ्यावरही झाल्याने शहरासह ग्रामीण भागात सिलिंडर उपलब्ध होण्यास मोठा विलंब होत आहे. अनेक गॅस एजन्सींमध्ये सिलिंडरची मागणी मोठ्या प्रमाणावर वाढली असली तरी पुरवठा मात्र मर्यादित असल्यामुळे ग्राहकांना प्रतीक्षा करावी लागत आहे.
हॉटेल बंद करण्याची वेळ
शहरातील हॉटेल सवेरा चालक युनूस कुरेशी सांगितले की, गॅस वेळेवर मिळत नसल्यामुळे व्यवसाय चालवणे कठीण झाले आहे. ग्राहकांना गरम चहा, नाश्ता किंवा जेवण देणे शक्य होत नाही. जर अशीच परिस्थिती राहिली तर काही दिवस हॉटेल बंद ठेवण्याची वेळ येऊ शकते, अशीही भीती त्यांनी व्यक्त केली.
