पैठण : पैठण शहरातील पूजा प्रभाकर व्होरकटे (वय २९ रा.पैठण) या महिला डॉक्टरने मंगळवारी (दि.१) आपल्या सहा महिन्याच्या बाळासह पाटेगाव येथील गोदावरी नदीत उडी घेऊन आपली जीवनयात्रा संपविली होती. या महिला डॉक्टरचा मृतदेह काही तासातच आढळून आला. परंतु क्रिश या सहा महिन्याच्या बाळाचा मृतदेह शोध घेऊनही काल सापडला नाही.
पैठण पोलीस निरीक्षक संजय देशमुख यांनी अग्निशमन दलाच्या जवानांना बुधवारी (दि.२) सकाळी पुन्हा पाचरण करून शोधकार्य सुरू केले. अग्निशमन दलाचे अधिकारी रायबा पाटील, अशोक खेडकर यांच्या मार्गदर्शनाखाली वसीम पठाण, जवान दिनेश मुंगसे, केतन घाडगे, संग्राम मोरे, प्रसाद शिंदे, सुजित कल्याणकर, अजिंक्य भगत, रवी दुधे, मतीन शेख, नंदकुमार घुगे, पैठण अग्निशामन दलाचे खलील धांडे, अमोल शेजुळ, जबी धांडे यांनी तब्बल १८ तासांनतर नदीतून बाळाचा मृतदेह शोधून काढला.