Criminals smoke cigarettes in court premises
छत्रपती संभाजीनगर, पुढारी वृत्तसेवा सोशल मीडियावर गुन्हेगारांच्या प्रोफाइलवर गैंगस्टर, माफिया, डॉन असे हॅशटॅगसह रील, न्यायालय आणि जेलबाहेरचे व्हिडिओ व्हायरल केले जात असताना तेजाच्या साथीदाराने थेट न्यायालयाच्या आवारात सिगारेट ओढतानाचा व्हिडिओ समोर आला आहे. दरम्यान, पोलिस यंत्रणा करते काय असा सवाल करत दै. पुढारीने कुख्यात गुन्हेगार बनले पोलिसांची डोकेदुखी या मथळ्याखाली बुधवारी वृत्त प्रकाशित केले होते. त्यानंतर पोलिस दल कामाला लागले आहे. सायबर पोलिसांना सर्व गुन्हेगारांच्या सोशल मीडिया खात्यांची तपासणी करून कारवाईचे आदेश देण्यात आल्याची माहिती गुन्हे शाखेचे उपायुक्त रत्नाकर नवले यांनी बुधवारी (दि. १३) दिली.
शहरात कुख्यात जावेद ऊर्फ टिप्या, फैजल ऊर्फ तेजा, निशिकांत ऊर्फ बब्बी, पवन जैस्वाल, कुख्यात गुन्हेगार जमीर कैची यांच्यासह अन्य छोट्या मोठ्या गुन्हेगारांच्या टोळ्या सक्रिय आहेत. या गुन्हेगारांवर पोलिसांचा वचक राहिलेला नाही. गुन्हेगारांचे फॉलवर्स अधिक असून पोलिस घेऊन जाताना, न्यायालयात नेताना देखील व्हिडिओ काढून गुन्हेगार सोशल मीडियावर दहशत निर्माण करतात. जेलच्या बाहेर पडल्यानंतर रॅली, हारतुऱ्यांनी सत्कार केल्याच्या रील तर सर्रासपणे दिसून येत आहेत. दरम्यान, सायबर पोलिसांकडे कुख्यात ४० ते ५० गुन्हेगारांची यादी असून त्यांच्या सोशल मीडिया खात्यांची तपासणी करण्यात येत आहे. एक उपनिरीक्षक आणि ८ अंमलदार याच कामी लागेलले आहेत. दरम्यान, यापूर्वी देखील सोशल मीडियावर तलवार, पिस्तूल घेऊन फोटो, पोलिसांच्या वाहनावर पाय ठेऊन व्हिडिओ व्हायरल केल्याप्रकरणी पाच गुन्हे दाखल करण्यात आले असल्याची माहिती सायबर ठाण्याचे पोलिस निरीक्षक शिवचरण पांढरे यांनी दिली.
तेजाचाच एक साथीदार हातात हातकडी असताना चक्क न्यायालयाच्या आवारात हातात हातकडी अन् मित्राच्या खांद्यावर हात ठेवून चक्क सिगारेट ओढतानाचा व्हिडिओ व्हायरल झाला आहे. अशा सराईत गुन्हेगारांचे पोलिसच लाड पुरवीत असल्याने यांची मस्ती आणखीच वाढली आहे. या पोलिसांवर देखील कारवाई होणार का हे पाहणे महत्त्वाचे ठरणार आहे.
