Crime News: Pharmacy student brutally beaten with a rod
छत्रपती संभाजीनगर, पुढारी वृत्तसेवा : कॅफेमध्ये भेटलेल्या परिचयाच्या तरुणांनी फिरण्याच्या बहाण्याने कारमध्ये बसवून नेले आणि पैशाची मागणी करत एका फार्मसीच्या विद्यार्थ्याला रॉड आणि लाथाबुक्क्यांनी बेदम मारहाण केली. ही घटना ३० जूनला रात्री ८ वाजेच्या सुमारास चिकलठाणा एमआयडीसी परिसरातील पाम हॉटेलसमोर घडली. याप्रकरणी एमआयडीसी सिडको पोलिस ठाण्यात मंगळवारी (दि.७) चौघांवर गुन्हा दाखल करण्यात आला आहे. नाविद सय्यद, राफे हुसैन (रा. रोजाबाग), राफे आणि अबू बकर अशी आरोपींची नावे आहेत.
फिर्यादी यामीन आरेफ नक्षबंदी (२३, रा. एव्हरेस्ट कॉलेजजवळ, जटवाडा रोड) याच्या तक्रारीनुसार, तो फार्मसीचे शिक्षण घेतो. ३० जून रोजी रात्री आठ वाजेच्या सुमारास तो चिकलठाणा एमआयडीसी येथील 'विस्क कॅफे' मध्ये जेवणासाठी गेला होता. तिथे त्याला ओळखीचा नाविद, राफे हुसैन, राफे आणि अबू बकर हे भेटले.
त्यांनी 'चल हम बाहर घुमकर आयेंगे', असे म्हणत यामीनला कॅफेबाहेर बोलावले. त्यानंतर नाविद चालवत असलेल्या काळ्या रंगाच्या कारमध्ये बसवून ते त्याला पाम हॉटेलसमोरील फ्लेमिंगो सोसायटीजवळ घेऊन गेले.
मारहाण करून रस्त्यावर फेकले
त्या ठिकाणी आरोपींनी यामीनकडे पैशाची मागणी केली. मात्र त्याने पैसे देण्यास नकार दिल्याने आरोपींनी त्याला शिवीगाळ करत जिवे मारण्याची धमकी दिली. तसेच गाडीतून खाली ओढून रस्त्यावर पाडले आणि लाथाबुक्क्यांसह रॉडने त्याचे दोन्ही पाय, पाठीवर आणि छातीवर बेदम मारहाण केली. यामीनला विस्क कॅफे येथील त्याच्या गाडीजवळ जखमी अवस्थेत सोडून आरोपी निघून गेले. तपास हवालदार अरविंद मेने करत आहेत.
