पिशोर : पिशोर पोलीस ठाणे हद्दीत विनापरवाना बेकायदेशीररित्या देशी दारू विक्रीच्या उद्देशाने साठा बाळगणाऱ्या एका इसमाविरुद्ध पिशोर पोलिसांनी कारवाई करत ११ हजार ५२० रुपये किमतीचा देशी दारूचा मुद्देमाल जप्त केला. ४ सप्टेंबर रोजी रात्री ९.४५ वाजता पिशोर नाका येथे ही कारवाई करण्यात आली. यावेळी ज्ञानेश्वर रामदास सुरडकर (वय ४४, रा. डिगर, पिशोर.) याच्या ताब्यात देशी दारूचा साठा आढळून आला.
पोलिसांनी त्याच्याकडून ‘संजिवनी संत्रा’ असे कागदी लेबल असलेल्या १८० एम.एल. क्षमतेच्या एकूण ९६ सीलबंद काचेच्या बाटल्या जप्त केल्या. प्रत्येक बाटलीची विक्री किंमत १२० रुपये असून, जप्त मुद्देमालाची एकूण किंमत ११,५२० रुपये आहे. या प्रकरणी पिशोर पोलीस ठाण्यात कलम ६५(ई) महाराष्ट्र दारूबंदी कायद्यान्वये गुन्हा दाखल करण्यात आला आहे. पुढील तपास पोहेकॉ. डी. आर. लोखंडे करीत आहेत.
ही कारवाई पोलीस अधीक्षक प्रकाश भा. जाधव, अपर पोलीस अधीक्षक प्रशांत स्वामी तसेच सहाय्यक पोलीस अधीक्षक अपराजिता अग्निहोत्री (कन्नड उपविभाग) यांच्या मार्गदर्शनाखाली आणि सहाय्यक पोलीस निरीक्षक कुणाल सूर्यवंशी यांच्या नेतृत्वाखाली करण्यात आली. कारवाईत पोह.परमेश्वर दराडे, पोहेकॉ.दत्ता लोखंडे, पो.कॉ. गणेश कव्वाल, पो.कॉ. अन्सार पटेल व पोका.करण म्हस्के यांनी सहभाग घेतला. पिशोर पोलीस ठाणे हद्दीत अवैध दारूची विक्री, वाहतूक व साठवणूक करणाऱ्यांविरुद्ध यापुढेही कठोर व प्रभावी कायदेशीर कारवाई करण्यात येणार असल्याचे पोलिसांनी स्पष्ट केले.
