छत्रपती संभाजीनगर : शहर पोलिस शिपाई पदाच्या २१२ जागांसाठी १९ ते २६ जूनदरम्यान मैदानी चाचणी पार पडली. यातील १ जागेसाठी १० याप्रमाणे २ हजार २२८ उमदेवार लेखी परीक्षेसाठी पात्र ठरले आहेत. त्यांची लेखी परीक्षा ७ जुलैला करोडी टोलनाक्याजवळील गुरुमाऊली वेअर हाऊसमध्ये ठेवण्यात आली आहे, अशी माहिती पोलिस उपायुक्त शीलवंत नांदेडकर यांनी दिली.
लेखी परीक्षेसाठी पात्र उमेदवारांची सामाजिक व समांतर आरक्षणासह गुणांची यादी संकेतस्थळावर प्रसिद्ध करण्यात आली आहे. लेखी परीक्षेस पात्र उमेदवारांपैकी काही उमेदवारांनी अनुसूचित जाती (एससी), विमुक्त भटक्या जमाती (व्हीजेए), भटक्या जमाती - ब (एनटी -बी), भटक्या जमाती - क (एनटी - सी), भटक्या जमाती - ड (एनटी- डी) या प्रवर्गाच्या जागा रिक्त नसतानाही त्यांनी मूळ प्रवर्गातून अर्ज केलेले आहेत. त्यांना अराखीव प्रवर्गाच्या अटी व शर्तींच्या अधीन राहून अराखीव प्रवर्गातून प्रवेश दिलेला आहे. त्यांना तसे लेखी परिक्षेपूर्वी बंधपत्र देणे आवश्यक आहे. बंधपत्र न दिल्यास भरती प्रक्रियेच्या कोणत्याही टप्प्यावर अपात्र करण्यात येईल, असेही नांदेडकर यांनी सांगितले.
परीक्षेचे ठिकाण : राम नवले यांचे गुरूमाऊली वेअर हाऊस, गट नं. १२९, करोडी टोलनाका, ओम साई हॉटेलच्या मागे, सोलापूर-धुळे राष्ट्रीय महामार्ग
परीक्षेची तारीख व वेळ : ७ जुलैला दुपारी ३ वाजता लेखी परीक्षा घेतली जाईल. मात्र, उमेदवारांना सकाळी साडेअकरा वाजता हजर रहावे लागेल.
उमेदवारांना लेखी परीक्षेकरीता परीक्षा पॅड व ब्लॅक पेन पुरविला जाईल. उमेदवारांनी प्रवेशपत्र व आवेदन अर्ज सोबता आणावा.
उमेदवारांनी किंमती वस्तू, कॅल्क्युलेटर, स्मार्ट वॉच, मोबाइल, हेडफोन, ब्ल्युटूथ हेडफोन व इतर इलेक्ट्रॉनिक वस्तू सोबत बाळगू नयेत.
