BJP protests against sexual harassment at JNU
पुढारी वृत्तसेवा : जवाहरलाल नेहरू विद्यापीठाचे (जेएनयू) प्राध्यापक तथा काँग्रेस खासदार डॉ. अंगोमचा बिमोल अकोइजाम यांनी ११ विद्यार्थिनींच्या लैंगिक छळ केल्याचा आरोप करीत सोमवारी भाजप शहर व ग्रामीण कार्यकारिणी व महिला मोर्चाच्या वतीने क्रांतीचौकात जोरदार निदर्शने करण्यात आली. तसेच काँग्रेसविरोधात जोरदार घोषणा देत परिसर दणाणून टाकला.
यावेळी माजी केंद्रीय अर्थ राज्यमंत्री डॉ. भागवत कराड, माजी आमदार संजय केणेकर, शहर जिल्हाध्यक्ष किशोर शितोळे, महापौर समीर राजूरकर, सभापती अनिल मकरिये, महिला मोर्चाच्या शहर जिल्हाध्यक्षा डॉ. उज्ज्वला दहिफळे आणि ग्रामीण पूर्व जिल्हाध्यक्षा ऐश्वर्या गाडेकर यांच्यासह नगरसेविका, पदाधिकारी व कार्यकर्त्या मोठ्या संख्येने उपस्थित होत्या.
महिला मोर्चाच्या प्रदेशाध्यक्षा आमदार चित्रा वाघ यांच्या आदेशानुसार आणि भाजप शहर जिल्हाध्यक्ष शितोळे यांच्या मार्गदर्शनाखाली हे आंदोलन झाले. जेएनयूतील प्राध्यापक तथा काँग्रेस खासदार डॉ. अंगोमचा बिमोल अकोइजाम यांच्याशी संबंधित कथित प्रकरणावर काँग्रेस नेतृत्वाने मौन न बाळगता नैतिक जबाबदारी स्वीकारावी.
तसेच संबंधित विद्यार्थिनींना न्याय मिळवून देण्यासाठी ठोस भूमिका घ्यावी, अशी मागणी आंदोलकांनी केली. महिलांचा सन्मान आणि विद्यार्थिनींची सुरक्षितता हा महत्त्वाचा विषय असून, महिलांवरील अन्यायाच्या घटनांविरोधात आवाज उठविणे आवश्यक असल्याचे महिला मोर्चाच्या पदाधिकाऱ्यांनी सांगितले. तसेच विद्यार्थिनींच्या सुरक्षिततेसाठी आणि पीडितांना न्याय मिळवून देण्यासाठी संघर्ष सुरू ठेवण्याचा निर्धार यावेळी व्यक्त करण्यात आला.
