An attempt was made to burn elderly people alive while they were sleeping in Mukundwadi
छत्रपती संभाजीनगर, पुढारी वृत्तसेवा : मुकुंदवाडी परिसरातील गेट नं. ५६ जवळ एका मद्यधुंद तरुणाने दुकानात झोपलेल्या दोन वृद्धांना जिवंत जाळण्याचा प्रयत्न केल्याची धक्कादायक घटना उघडकीस आली आहे. या जीवघेण्या हल्ल्यात आरोपीने वृद्धांच्या अंथरुणाला आग लावली आणि दुकानातील रोकडसह मोबाईल लंपास केला. ही घटना मंगळवारी (दि. २७) मध्यरात्री २:३० वाजेच्या सुमारास घडली. संदीप इंगळे असे आरोपीचे नाव आहे.
फिर्यादी सुभाष भाऊराव निकाळजे (७५) हे २६ जानेवारी रोजी रात्री ९ वाजेच्या सुमारास वाल्मीक आश्रम परिसरातील शशिकांत शिंगणे यांच्या दुकानाजवळ बसले होते.
यावेळी ओळखीचा असलेला आरोपी संदीप इंगळे हा दारूच्या नशेत तिथे आला आणि त्याने वृद्धांना विनाकारण शिवीगाळ करण्यास सुरुवात केली. वाद वाढू नये म्हणून निकाळजे आणि शिंगणे तिथून दुसऱ्या दुकानावर निघून गेले, मात्र आरोपीने तिथेही येऊन त्यांना तुम्हाला थोड्या वेळात बघून घेतो, अशी धमकी दिली.
मध्यरात्री अडीच वाजेच्या सुमारास, जेव्हा निकाळजे आणि शिंगणे हे दुकानाचे शटर ओढून आत झोपले होते, तेव्हा आरोपी संदीप इंगळे याने शटर उघडून आत प्रवेश केला. त्याने शिंगणे यांचा १३ हजारांचा मोबाईल आणि गल्ल्यातील अडीच हजार रुपयांची रोकड चोरली.
इतक्यावरच न थांबता, दोन्ही वृद्ध झोपेत असताना आरोपीने त्यांच्या अंथरुणाला आग लावून दिली. आगीचे चटके बसल्याने निकाळजे यांना जाग आली, तेव्हा त्यांना आरोपी पळून जाताना दिसला. या घटनेनंतर जखमी वृद्धांवर घाटी रुग्णालयात उपचार करण्यात आले.
त्यानंतर गुरुवारी मुकुंदवाडी पोलिस ठाण्यात जिवे मारण्याचा प्रयत्न केल्याप्रकरणी गुन्हा दाखल करण्यात आला आहे. पुढील तपास उपनिरीक्षक प्रशांत पासलकर करत आहेत.
