Accident News: Two employees of Gangakhed N.P. died in a truck-two-wheeler accident
गंगाखेड, पुढारी वृत्तसेवा : शहरातील परळी नाका परिसरातील महाराणा प्रताप चौक येथे गुरुवारी (दि. १६) सायंकाळी सुमारे ५ वाजेच्या सुमारास ट्रक व दुचाकीच्या समोरासमोर झालेल्या भीषण अपघातात गंगाखेड नगर परिषदेचे दोन कर्मचारी जागीच ठार झाले.
मिळालेल्या माहितीनुसार, नगर परिषदेच्या पाणीपुरवठा विभागातील कर्मचारी शेख मुनवर शेख छोटूमिया (वय ४५) व नगर परिषदेतील सेवक संतोष प्रल्हादराव साळवे (वय ५०) हे एमएच-२२-ए एक्स-०५७४ क्रमांकाच्या मोटारसायकलवरून परळी नाका येथील एका हॉटेलमध्ये चहा घेतल्यानंतर परत निघाले होते.
त्याचवेळी परभणीकडे एमएच-३८-एक्स-९९७७क्रमांकाचा ट्रक आणि त्यांच्या मोटारसायकलची समोरासमोर जोरदार धडक झाली. या धडकेनंतर पालिकेतील दोघेही कर्मचारी ट्रकच्या चाकाखाली सापडल्याने त्यांचा जागीच मृत्यू झाला. जाणारा दोघांच्याही डोक्याला गंभीर दुखापत झाली असून, एका मृताच्या पोटावरून ट्रक गेल्याचे प्रत्यक्षदर्शीनी सांगितले.
घटनेची माहिती मिळताच गंगाखेड पोलिसांनी तात्काळ घटनास्थळी धाव घेत वाहतूक सुरळीत केली. त्यानंतर दोन्ही मृतदेह गंगाखेड उपजिल्हा रुग्णालयात शवविच्छेदनासाठी हलविण्यात आले. शवविच्छेदनाची प्रक्रिया सुरू होती. गंगाखेड पोलीस ठाण्यात अपघाताची नोंद करण्याची प्रक्रिया सुरू करण्यात आली होती. या दुर्दैवी घटनेमुळे नगर परिषद कार्यालयासह शहरात शोककळा पसरली आहे.
