6 Illegal Buffalo Sheds in Begumpura Removed
छत्रपती संभाजीनगर, पुढारी वृत्तसेवा बेगमपुऱ्यातील स्मशानभूमी आणि खाम नदीपात्रालगत असलेल्या महापालिकेच्या जागेवर अनेक वर्षांपासून अतिक्रमण करून म्हशीचे गोठे आणि भंगाराचे गोदाम उभारण्यात आले होते. याबाबत महापालिकेच्या पथकाला माहिती मिळताच गुरुवारी येथील ६ गोठे आणि एक गोदामचे अतिक्रमण काढलण्यात आले.
नारेगावातील अतिक्रमणांवर हातोडा मारल्यानंतर दुसऱ्या दिवशी गुरुवारी (दि. १४) महापालिका अतिक्रमण विभागाने बेगमपुर्यात धडक मोहीम राबविली. या भागात वर्षानुवर्षांपासून म्हशींचे अवैध गोठे आहेत. यातील काही गोठे हे महापालिकेच्या जागेत अतिक्रमण करून उभारण्यात आले आहेत.
महापालिकेकडे याबाबत तक्रारी प्राप्त झाल्याने गुरुवारी पथकाने हे अतिक्रमण काढण्याचा निर्णय घेतला. महापालिकेच्या स्मशानभूमीलगत खामनदीच्या शेजारीच हे अतिक्रमण असून यात तब्बल ६ गोठे उभारण्यात आले आहेत. त्यासोबतच गोठ्याच्या बाजूला एक भंगारचे दुकानही थाटण्यात आले आहे.
दरम्यान, मनपा आयुक्त अमोल येडगे, अतिक्रमण विभागाचे संनियंत्रण अधिकारी संतोष वाहुळे यांच्या आदेशाने उपायुक्त सविता सोनवणे, झोन क्र. १ च्या लता पुजारी, संजय सुरडकर, बेगमपुरा पोलिस ठाण्याचे निरीक्षक नरेंद्र पापळकर, इमारत निरीक्षक मुकेश खडसे, रवींद्र देसाई, सागर श्रेष्ठ आदींच्या पथकाने ही कारवाई केली. महापालिकेच्या एक एकर जागेत हे अतिक्रमण करण्यात आले होते. पत्र्याचे शेड उभारून गोठे बांधले होते. तसेच आसपास दोन-तीन मातीची घरेही बांधली होती. हे सर्व अतिक्रमण काढून जागा मोकळी करून घेतली, अशी माहिती उपायुक्त सोनवणे यांनी दिली.
