30 plots will be allotted in Auric-Bidkeen and 11 in Sendra
छत्रपती संभाजीनगर, पुढारी वृत्तसेवा ऑरिकच्या शेंद्रा-बिडकीन औद्योगिक क्षेत्रात जागेअभावी अनेक उद्योग वेटींगवर असताना आता भूखंड मिळविण्याची प्रक्रिया पुन्हा सुरू झाली आहे. बिडकीनमधील ३०, तर शेंद्रातील ११ भूखंडांचा ऑनलाइन अर्ज मागविले आहेत. या भूखंडासाठी ४ सप्टेंबर २०२६ रोजी सायंकाळी पाच वाजेपर्यंत अर्ज दाखल करता येणार आहे.
या भूखंडांमध्ये बिडकीन येथील ११ इंडस्ट्रियल एमएसएमई, दोन एमएसएमई (एससी-एसटी आरक्षण), सहा फूड पार्क, चार व्यावसायिक आणि चार निवासी भूखंड आहेत. याशिवाय बिझनेस हॉटेल, उच्च माध्यमिक शाळा आणि फ्युएल स्टेशन-कम-वर्कशॉपसाठी प्रत्येकी एक भूखंड ठेवण्यात आला आहे. एमएसएमईसाठी उपलब्ध भूखंडांचे क्षेत्रफळ साधारण १,२९६ ते २,७२४ चौरस मीटर आहे.
फूड पार्कमधील भूखंडांचे क्षेत्रफळ ४,५०० चौरस मीटरपासून तब्बल ३५ हजार चौरस मीटरपेक्षा अधिक आहे. त्यामुळे छोट्या उद्योगांसोबतच अन्नप्रक्रिया क्षेत्रातील मोठ्या प्रकल्पांनाही येथे जागा मिळण्याची शक्यता आहे. शेंद्रामध्ये दोन व्यावसायिक, सहा निवासी तसेच रुग्णालय-अमेनिटी आणि कम्युनिटी शॉपिंग-अमेनिटीसाठी भूखंड उपलब्ध आहेत. त्यामुळे औद्योगिक क्षेत्राबरोबरच निवासी, व्यावसायिक आणि सेवा सुविधांचा विस्तार करण्यावरही भर असल्याचे स्पष्ट होते.
