25 tolas of gold looted after breaking into a house in Pawan Nagar
छत्रपती संभाजीनगर, पुढारी वृत्तसेवा : पुतणीच्या लग्नासाठी जामनेर येथे गेलेल्या कुटुंबीयांचे घर फोडून चोरट्याने सुमारे २४ तोळ्यांहून अधिक सोन्याचे दागिने, चांदी आणि रोख ५० हजार असा लाखोंचा ऐवज लंपास केला. ही धाडसी घरफोडी रविवारी (दि.८) पहाटेच्या सुमारास सिडको एन-९ मधील पवननगर भागात उघडकीस आली. घटनेमुळे सिडको परिसरात खळबळ उडाली आहे. या सोन्याच्या दागिन्यांचे सध्याचे बाजारमूल्य हे ४० लाखांच्या घरात आहे.
फिर्यादी धनसिंग विनायकराव तोमर (६२, रा. पवननगर, एन-९ सिडको) हे मेडिटर सेक्युरिटी या खासगी सुरक्षा कंपनीत फिल्ड ऑफिसर म्हणून कार्यरत आहेत. त्यांचा एक मुलगा विदेशात तर दुसरा पुणे येथे नोकरीनिमित्त स्थायिक आहे. तोमर यांच्या पुतणीचे लग्न जामनेर येथे असल्याने ते ७ फेब्रुवारी रोजी सकाळी ७ वाजता पत्नीसह घराला कुलूप लावून गेले होते.
जाताना त्यांनी घराच्या चाव्या शेजारी राहणारे सुनील आढाव यांच्याकडे दिल्या होत्या. ८ फेब्रुवारी रोजी पहाटे ४.५३ च्या सुमारास आढाव यांनी तोमर यांना फोन करून माहिती दिली की, त्यांच्या घराचा दरव-ाजा उघडा असून, घरातील लाईट सुरू आहेत. तोमर यांनी तातडीने शहरात धाव घेतली. सकाळी ८.३० वाजता घरी पोहोचल्यानंतर त्यांना घराची अवस्था पाहून धक्काच बसला.
चोरट्यांनी मुख्य दरवाजाचे लॉक तोडून आत प्रवेश केला. त्यानंतर पहिल्या मजल्यावरील बेडरूममधील लाकडी कपाटाचे लॉकर तोडून त्यातील सोन्या-चांदीचे दागिने आणि रोख ५० हजार रुपये लंपास केले. चोरट्यांनी घरातील साहित्य आणि कपडे अस्ताव्यस्त फेकून दिले होते. घटनेची माहिती मिळताच सिडको पोलिसांनी घटनास्थळी धाव घेऊन पंचनामा केला. अधिक तपास पोलिस निरीक्षक अतुल येरमे यांच्या मार्गदर्शनात उपनिरीक्षक निवृत्ती गायके करत आहेत.
