Woman Dies in Accident Mehkar Pandharpur Highway
माजलगाव : मेहकर-पंढरपूर या पालखी महामार्गावरील तेलगाव-माजलगाव रस्त्यावर रविवारी (दि.१) रात्री ११ वाजण्याच्या सुमारास अपघात झाला. त्यात तीनजण जागीच ठार तर दोनजण गंभीर जखमी झाले होते. दरम्यान, रात्री १ वाजता जखमी महिलेस माजलगाव शहरातील रूग्णालयात उपचार करून छत्रपती संभाजीनगर येथील रूग्णालयात दाखल केले होते. या महिलेची प्रकृती अत्यंत चिंताजनक होती. उपचारादरम्यान आज (दि.२) सकाळी आठ वाजता तिचा मृत्यू झाला. फरीदा अन्वर पठाण असे मृत महिलेचे नाव आहे.
मृत महिलेला ३ मुले असून १ मुलगा १ वर्षाचा आहे. तर या महिलेचे सासर सिरसाळा येथे आहे. तिथे तिचे पतीसोबत सतत भांडणे होत होती. त्यामुळे तिचे आई वडील सिरसाळा येथे गेले होते. रात्री उशिरा तिला घेऊन ते येत असताना हा अपघात झाला.
अपघातातील जखमींना माजलगाव येथील संजीवणी हॉस्पिटलमध्ये उपचारार्थ पाठविण्यात आले. मृतांमध्ये पतीपत्नीचा समावेश आहे . हा अपघात एवढा भीषण होता की, आयशरने ॲटोला जवळपास ५० ते ६० फुट अंतरापर्यंत फरफटत नेले.
माजलगाव तालुक्यातील भाटवडगाव येथील काही लोक ॲटो (एम एच.२३ एन ०२७३) ने रविवारी अकरा ते साडेअकरा वाजेदरम्यान तेलगावकडून माजलगावकडे जात होता. ॲटो नित्रुड जवळील एका पेट्रोल पंपासमोर आली असता समोरून येणाऱ्या आयशर (एम.एच.२३ एम.९२५५) ने ॲटोला जोराची धडक दिली.
