SIR | मतदार यादी विशेष सखोल पुनरीक्षण : आता बीएलओंना सहाय्यक म्हणून शिक्षकांशिवाय इतर शासकीय, निमशासकीय कर्मचाऱ्यांची नियुक्ती

Non Teaching Staff Election Duty

परळी वैजनाथ: राज्यभर सुरू असलेल्या मतदार यादीच्या विशेष सखोल पुनरीक्षण (SIR) मोहिमेसाठी शिक्षकांची मोठ्या प्रमाणावर नियुक्ती करण्यात आल्याने परळी तालुक्यातील जिल्हा परिषद शाळांमधील अध्यापन व्यवस्था कोलमडल्याचे चित्र 'दै. पुढारी'ने समोर आणले होते.

त्यानंतर आता या कामासाठी बीएलओंना सहाय्यक म्हणून शिक्षकांशिवाय इतर शासकीय / निमशासकीय कर्मचारी यांची नियुक्ती करण्यात आली आहे. शाळाही सुरु राहतील व अध्यापन व्यवस्थाही निरंतर चालेल यादृष्टीने या नियुक्त्या करण्यात आल्या आहेत.

भारत निवडणूक आयोगाने विशेष सखोल पुनरिक्षण कार्यक्रम घोषित केलेला असून त्याअनुषंगाने, परळी वैजनाथ तालुक्यात ही मोहीम सुरु झाली आहे. कामकाज हे भारत निवडणूक आयोगाच्या निर्देशांप्रमाणे दि. ३०/०६/२०२६ ते २९/०७/२०२६ या कालावधीत पूर्ण करणे आवश्यक आहे. त्यानुषंगाने मतदान केंद्रस्तरीय अधिकारी (BLO) म्हणून जि.प.शिक्षक नियुक्त करण्यात आले आहेत.

या कामासाठी शिक्षकांची नियुक्ती मोठ्या प्रमाणात झाल्याचे निदर्शनास आले होते. तसेच मतदान केंद्रस्तरीय अधिकारी (BLO) याना देण्यात आलेले सहाय्यक हे सुद्धा बहूतांश प्रमाणात शिक्षक असल्याने विद्यार्थ्यांचे शैक्षणिक नुकसान होत आहे हे वास्तव चित्र समोर आले.

या अनुषंगाने आता या कामासाठी बिएलओंना सहाय्यक म्हणून शिक्षकांशिवाय इतर शासकीय / निमशासकीय कर्मचारी यांची नियुक्ती करण्यात आली आहे. परळी वैजनाथ तालुक्यातील मतदान केंद्रस्तरीय अधिकारी (BLO) यांना सहाय्यक म्हणून आता शिक्षकांना नियुक्ती न देता ग्रामीण भागामध्ये ग्राम महसूल अधिकारी, ग्राम पंचायत अधिकारी, पोलीस पाटील, महसूल सेवक, अंगणवाडी सेविका, विद्युत वितरण कंपनीचे मिटर रिडींग घेणारे कर्मचारी, पोस्टमन व असे कर्मचारी ज्यांना सदर गावातील स्थानिक माहिती आहे. इतर शासकीय / निमशासकीय कार्यालयातील कर्मचारी यांची नियुक्ती करण्यात आली आहे.