Dharur Hingni lake boat accident
धारूर : मत्स्य व्यवसाय करणाऱ्या परिवारातील 5 मुली धारूर तालुक्यातील हिंगणी तलावात शनिवारी (दि.१६) सकाळी साडेदहाच्या दरम्यान पोहण्यास गेल्या होत्या. तिथे मासे पकडण्यासाठी बनवलेल्या होडीवर तिघीजणी बसल्या असता दोघींचा पाण्यात बुडून मृत्यू झाला. तर एक जण आश्चर्यकारक रित्या बचावली. दरम्यान या घटनेने हिंगणी गावावर शोककळा पसरली आहे.
याबाबत अधिक माहिती अशी की, हिंगणी येथील पारवे कुटुंबातील पलक शामराव पारवे, दिव्या विकास कांबळे, मोहिनी भीमराव पारवे, तन्वी कोंडीराम पारवे, जानवी कोंडीराम पारवे यामुली हिंगणीचा तलावावर शनिवारी सकाळी पोहण्यास गेल्या होत्या, तिथे उपलब्ध असलेल्या मासे पकडण्याच्या होडीवर पलक, दिव्या व मोहिनी या तिघीजण बसल्या.
तलावात आत गेल्यावर अचानक होडी पलटल्याने तिघीही पाण्यात बुडाल्या. यात मोहिनीला पोहता येत होते. पलक व दिव्या या दोघींनी तिला पकडल्याने तीही पाण्यात बुडाली. तळ्याच्या काठावर असलेल्या मुलींनी आरडाओरडा केल्याने स्थानिकांनी घटनास्थळावर धाव घेत तिघींना बेशुद्ध अवस्थेत पाण्याबाहेर काढले.
यात मोहिनीला शुद्ध आली असून पलक शामराव पारवे (वय 14, रा.हिंगणी व दिव्या विकास कांबळे रा. कासारवाडी ता.परळी) यांना अंबाजोगाई येथील रुग्णालयात दाखल करण्यात आले असता मृत्यू घोषित करण्यात आले. या घटनेनंतर हिंगणी गावात शोककळा पसरली होती.
