परळी वैजनाथ : पुढारी वृत्तसेवा
परळी वैजनाथ शहराच्या जुन्या गावभागातील आंबेवेस परिसरात चोरीची घटना घडली असून या घटनेत लाखो रुपयांचे दागिने चोरट्यांनी लंपास केले आहेत. नवीन घरात गुढी उभारण्यासाठी डांगे गल्लीतून खंडोबा गल्लीत गेल्यानंतर चोरट्यांनी संधी साधून हा डल्ला मारला आहे.
परळी वैजनाथ शहरातील आंबेवेस परिसरातील डांगे गल्ली येथे एका बंद घराचे कुलूप तोडून अज्ञात चोरट्याने सुमारे दीड लाख रुपयांचा ऐवज लांबवल्याची घटना घडली आहे. १८ मार्चच्या रात्री ही घरफोडी झाली असून, १९ मार्च रोजी ही बाब उघडकीस आली.
पुरुषोत्तम चोथवे हे गुढीपाडव्यानिमित्त घराला कुलूप लावून खंडोबा मंदिर परिसरातील आपल्या दुसऱ्या घरी गेले होते. हीच संधी साधून चोरट्याने दरवाजाचे कुलूप तोडून आत प्रवेश केला.
कपाटातील सोन्याची अंगठी, कानातील फुले, पुंगळे मणी, टॉपर, पट्टी गंठण, चांदीची चैन आणि पाच हजार रुपयांची नगदी असा खरेदी वेळेच्या किमतीनुसार एकूण दीड लाखाचा तर आजच्या सोन्याच्या बाजारभावा नुसार सहा ते सात लाख रुपये किमतीचा ऐवज चोरून नेला. याप्रकरणी परळी शहर पोलिस ठाण्यात गुन्हा दाखल करण्यात आला असून, पोलिस अधिक तपास करत आहेत.
