Manoj Jarange murder conspiracy
गेवराई: मराठा आंदोलनाचे नेते मनोज जरांगे पाटील यांना जीवे मारण्याचा कट रचल्याप्रकरणी दोन संशयिताना चौकशीसाठी जालना पोलिसांनी बुधवारी मध्यरात्री ताब्यात घेतले आहे. त्यांच्याविरुद्ध गुरुवारी रात्री गुन्हा दाखल करण्यात आला असल्याची माहिती गोंदी पोलिसांनी दिली.
गेवराई तालुक्यातील अमोल खुणे व विवेक उर्फ दादा गरुड असे दोन संशयित आरोपीची नावे आहेत. दोन्ही संशयित आरोपी हे स्थानिक गुन्हे शाखेच्या ताब्यात आहे. यातील एक आरोपी हा मनोज जरांगे पाटील यांचा जुना सहकारी आहे.
मनोज जरांगे पाटील यांची हत्या करण्याचा कट अडीच कोटींची सुपारी देवून रचल्याची तक्रार बुधवारी रात्री पोलिस अधीक्षकांकडे देण्यात आली. स्वत: जरांगे पाटील यांनीही बुधवारी मध्यरात्री पोलिस अधीक्षक अजयकुमार बन्सल यांची भेट घेऊन चर्चा केली. तक्रारीनुसार पोलिसांनी तातडीने पावले उचलत गेवराईतून दोन संशयितांना चौकशीसाठी ताब्यात घेतले आहे. या प्रकरणानंतर जरांगे पाटील यांच्या सुरक्षेत वाढ करण्यात आली आहे.
जरांगे पाटील यांना जीवे मारण्याचा कट बीड जिल्ह्यात झालेल्या एका बैठकीत रचण्यात आला होता. त्याच बैठकीत असलेल्या समर्थकाने जरांगे पाटील यांना ही बाब सांगितली. त्यानंतर जरांगे पाटील यांचे सहकारी गंगाधर काळकुटे यांनी बुधवारी (दि. ५) रात्री पोलिस अधीक्षक अजयकुमार बन्सल यांची भेट घेऊन तक्रार केली. जरांगे यांनीही पोलिस अधीक्षकांची भेट घेऊन चर्चा केली.
या तक्रारीनुसार पोलिस अधीक्षकांनी हे प्रकरण गांभीर्याने घेत गेवराई येथील दोन संशयितांना पथकाच्या माध्यमातून तातडीने ताब्यात घेतले. त्यातील एक संशयित हा जरांगे पाटील यांचा जुनाच सहकारी असल्याचे सांगितले जात आहे. दरम्यान, माझ्या खुनाचा कट रचल्याचे सत्य आहे, असे जरांगे यांनी सांगितले आहे.
