केज (बीड) : काळवीटाची शिकार करून त्याचे मांस व चमड्याची तस्करी करणाऱ्या धाराशिव जिल्ह्यातील सहा संशयित आरोपींना वनविभागाच्या अधिकाऱ्यांनी आज (दि.१५) अटक केली. या रॅकेटमधील आणखी काहीजण हाती लागण्याची शक्यता आहे.
केज तालुक्यातील केकत सारणी येथील शिवारात काळवीट जाळ्यात पकडून त्याची मान धारदार शस्त्राने कापून शिकार झाल्याची माहिती पोलिसांना मिळाली. त्यानंतर पोलिसांनी ही माहिती धारूर वन विभागाच्या अधिकाऱ्यांना दिली. त्यानंतर वनपरिक्षेत्र अधिकारी उत्तम चिकटे यांच्या आदेशाने वनरक्षक वचिष्ट भालेराव, वाहन चालक शाम गायसमुद्रे हे तात्काळ घटनास्थळी धाव घेत मृत काळवीटसह सहा जणांना रंगेहाथ अटक केली. त्यानंतर चंदनसावरगाव येथील पशू वैद्यकीय दवाखान्यात या काळवीटचे शवविच्छेदन करण्यात आले. केज तालुक्यात काळवीटची शिकार करून त्याचे मांस व कातड्याची तस्करी करणारे मोठे रॅकेट असण्याची शक्यता वर्तविली जात आहे.
