माजलगाव, पुढारी वृत्तसेवा : माजलगाव तालुक्यातील शिंपेटाकळी ग्रामपंचायतीचे ग्रामसेवक व्ही. जी. पवार यांना लाचलुचपत प्रतिबंधक विभागाच्या पथकाने माजलगाव शहरात ११ हजारांची लाच घेताना रंगेहाथ पकडले. शिंपे टाकळी ग्रामपंचायत अंतर्गत पंतप्रधान आवास घरकुल योजनेचे ११४ घरकुल मंजूर झाले आहेत. परंतु, ग्रामविकास अधिकारी प्रती घरकुल १०-१५ हजार रुपये मागत असल्याचे वारंवार निदर्शनास आले होते.
या प्रकरणात घरकुल योजनेचा लाभ घेण्यासाठी पैशांची मागणी करण्यात आली होती. तक्रारदार परीस्थितीमुळे पैसे देऊ शकत नव्हते. त्यामुळे त्यांनी लाच लुचपत प्रतिबंध विभागाशी संपर्क साधून या संदर्भातील तक्रार केली होती. बुधवारी सायंकाळी ५ च्या सुमारास पवार यांना माजलगाव शहरातून ताब्यात घेण्यात आले.
शिंपेटाकळी ग्रामपंचायत अंतर्गत भ्रष्टाचार करता येईल, अशाच कामांचा ठराव घेऊन मनमानी पद्धतीने पवार यांनी केले आहेत. त्यामुळे गावात इतर निधी देखील मिळत नाही. परिणामी गावाचा विकास खुंटला आहे. मोठ्या प्रमाणात महसूल गोळा करून तो बुडविण्याचे काम पवार यांनी केल्याचा आरोप गावकऱ्यांनी केला आहे.
