केज :- राष्ट्रवादी शरद पवार गटाच्या प्रदेश उपाध्यक्ष तथा केजच्या माजी आमदार प्रा. संगीता विजयप्रकाश ठोंबरे यांनी आपल्या समर्थकांसह राज्याचे उपमुख्यमंत्री एकनाथ शिंदे यांच्या शिवसेना पक्षात प्रवेश केला आहे. त्यांच्या या प्रवेशाने शरद पवार गटाला जिल्ह्यात खिंडार पडले असून त्यांच्या प्रवेशामुळे केज मतदार संघात शिंदे सेनेची ताकद वाढली आहे. तर आगामी जिल्हा परिषद व पंचायत समितीच्या निवडणुकीत पक्षाला फायदा होणार आहे.
राष्ट्रवादी काँग्रेस ( शरद पवार गट) पक्षाच्या केज विधानसभेच्या माजी आमदार प्रा. संगीताताई विजय प्रकाश ठोंबरे यांनी मुंबई येथे उपमुख्यमंत्री एकनाथराव शिंदे यांच्या उपस्थितीत मुंबई येथे आपल्या समर्थकांसह प्रवेश केला. त्यांच्या या पक्ष प्रवेश प्रसंगी सामाजिक न्यायमंत्री संजय सिरसाठ, बीडचे जिल्हा प्रमुख अनिल जगताप, सचिन मुळुक, माजी आमदार ज्ञानराज चौगुले, धाराशिव विधानसभा मतदारसंघाचे शिवसेना नेते अजित पिंगळे यांच्यासह नेते व पदाधिकारी उपस्थित होते.
यावेळी शिवसेनेचे सामाजिक न्याय मंत्री संजय शिरसाट यांनी बीड जिल्ह्यातील पहिल्या माजी आमदार शिवसेना पक्षा सोबत जोडल्या गेल्या आहेत. माजी आ. प्रा. संगीता ठोंबरे या केज विधानसभा मतदार संघामध्ये शिवसेना पक्षाला उभारणी करण्यास प्रयत्नशील राहतील. त्यांचा जनसंपर्क दांडगा आहे. अशी अपेक्षा व्यक्त केली. यावेळी माजी आमदार प्रा. ठोंबरे यांच्या सोबत कुंबेफळचे माजी सरपंच किशोर थोरात, भगवान सेनेचे संस्थापक अध्यक्ष विजय केंद्रे, अशोक सक्राते, अरविंद चाळक, उमेश चाळक यांच्यासह केज मतदार संघातील पदाधिकारी व कार्यकर्त्यांनी शिवसेना पक्षात प्रवेश केला.
स्थानिक स्वराज्य संस्थेच्या निवडणुकीत करिष्मा घडणार
:- माजी आमदार प्रा. संगीताताई यांचा जनसंपर्क दांडगा असल्याने आगामी स्थानिक स्वराज्य संस्थेच्या निवडणुकीत शिवसेनेला त्यांचा फायदा होणार असून मिनी मंत्रालय असलेल्या बीड जिल्हा परिषदेचे अध्यक्षपद हे अनुसूचित जातीच्या महिलेसाठी आरक्षित आहे. त्यामुळे त्यांच्या पक्ष प्रवेशाला महत्व प्राप्त झाले आहे.
