कडा : स्वस्त दरात सोने मिळवून देण्याचे आमिष दाखवत सोलापूर जिल्ह्यातील एका तरुणाची तब्बल पाच लाख रुपयांची फसवणूक करण्यात आल्याची धक्कादायक घटना समोर आली आहे. बीड जिल्ह्यातील आष्टी तालुक्यातील अंभोरा पोलीस ठाण्याच्या हद्दीत ही घटना घडली. सोशल मीडियावरून ओळख करून घेत आरोपीने २५ तोळे सोने अवघ्या पाच लाख रुपयांत देण्याचे आमिष दाखवले. मात्र, प्रत्यक्षात बनावट धातूची नाणी देऊन रोख रक्कम घेऊन तो पसार झाला.
सोलापूर जिल्ह्यातील पंढरपूर तालुक्यातील मगरवाडी येथील आबासाहेब सुरेश क्षीरसागर (वय ३५) यांच्याशी एका अज्ञात व्यक्तीने सोशल मीडियावरून संपर्क साधला. त्याने स्वतःकडे २५ तोळे सोने असल्याचे सांगत ते केवळ पाच लाख रुपयांत देण्याची ऑफर दिली. बाजारभावाच्या तुलनेत अत्यंत कमी दर असल्याने क्षीरसागर यांनी त्याच्यावर विश्वास ठेवला. २ ऑगस्ट रोजी दुपारच्या सुमारास आरोपीने त्यांना आष्टी तालुक्यातील खुंटेफळ येथील शेतात बोलावले. तेथे २५ तोळे वजनाची सुमारे १५० बनावट धातूची नाणी सोन्याची असल्याचे सांगून त्यांच्या ताब्यात दिली. त्याबदल्यात पाच लाख रुपये रोख घेत आरोपी तेथून फरार झाला.
करमाळा येथे परतल्यानंतर नाण्यांची तपासणी केली असता ती बनावट असल्याचे स्पष्ट झाले. फसवणूक झाल्याचे लक्षात येताच आबासाहेब क्षीरसागर यांनी ३ ऑगस्ट रोजी अंभोरा पोलीस ठाण्यात फिर्याद दिली. त्यानुसार 'गजू डिजे' (पूर्ण पत्ता उपलब्ध नाही) या संशयिताविरुद्ध फसवणुकीचा गुन्हा दाखल करण्यात आला असून पोलिसांनी तपास सुरू केला आहे.
नागरिकांना पोलिसांचे आवाहन
अंभोरा पोलीस ठाण्याचे सहाय्यक पोलीस निरीक्षक विक्रांत हिंगे यांनी नागरिकांना आवाहन केले आहे की, सोशल मीडियावर किंवा अनोळखी व्यक्तींकडून स्वस्त दरात सोने, दागिने किंवा इतर मौल्यवान वस्तू देण्याचे आमिष दाखवले जात असल्यास त्यावर विश्वास ठेवू नये. कोणतीही संशयास्पद माहिती मिळाल्यास तातडीने जवळच्या पोलीस ठाण्यात संपर्क साधावा.
