Kej Police Station Fight
केज : परस्परांविरुद्ध तक्रार देण्यासाठी पोलीस ठाण्यात आलेल्या भावा -भावांमध्येच वाद चिघळून थेट हाणामारी झाली. या घटनेप्रकरणी ठाणे अंमलदारांच्या तक्रारीवरून चार जणांविरुद्ध गुन्हा नोंद करण्यात आला आहे.
मंगळवारी (दि. २४) दुपारी सुमारे ३:४५ वाजता केज पोलीस ठाण्यात जुनेद शाकेर शेख, मुसईब शाकेर शेख (दोघे रा. खाजा नगर, केज), तसेच सईद शाकेर शेख (रा. स्लाबेल अपार्टमेंट, डी. एन. रोड, मुंबई) आणि सलाउद्दीन नबाब काझी (रा. टिपू सुलतान चौक, कळंब रोड, केज) हे एकमेकांविरुद्ध तक्रार देण्यासाठी आले होते.
पोलीस ठाण्यात समोरासमोर येताच त्यांच्यात वाद झाला आणि त्याचे रूपांतर हाणामारीत झाले. त्यांनी एकमेकांना मारहाण करत झोंबाझोंबी केली तसेच आरडाओरडा करून सार्वजनिक शांततेचा भंग केला.
या प्रकरणी ठाणे अंमलदार म्हणून कर्तव्यावर असलेले पोलिस जमादार उमेश आघाव यांनी दिलेल्या तक्रारीवरून वरील चौघांविरुद्ध गुन्हा दाखल करण्यात आला आहे. पोलीस निरीक्षक स्वप्नील उनवणे यांच्या मार्गदर्शनाखाली सहाय्यक पोलीस निरीक्षक राजू वाघमारे पुढील तपास करत आहेत.
