Beed Crime News : A trader was brutally beaten up by a gang in Ashti taluka
कडा, पुढारी वृत्तसेवा : आष्टी तालुक्यातील शेरी फाटा येथे हॉटेलमध्ये जेवण्यासाठी गेलेल्या तरुणाला 'आमच्या दाजीला शिवीगाळ का केली?' असे म्हणत 7 ते 8 अज्ञात व्यक्तींनी बेदम मारहाण केल्याची घटना 1 ऑक्टोबर रोजी रात्री घडली. मारहाणीदरम्यान एका व्यक्तीने दगडाने डोक्यात वार केल्याने प्रसिद्ध लिंबू व्यापारी अक्षय महाडीक गंभीर जखमी झाले असून, त्यांच्यावर कडा येथील हारकर हॉस्पिटलच्या मध्ये उपचार सुरू आहेत.
फिर्यादी यांच्या तक्रारीनुसार, शेरी फाटा येथील अंबिका लॉजसमोर असलेल्या एका हॉटेलमध्ये रात्री साडेनऊच्या सुमारास अक्षय महाडीक जेवण्यासाठी आले होते. जेवण करून पैसे दिल्यानंतर ते हॉटेलमधून बाहेर पडत असताना तेथे उपस्थित असलेल्या 7 ते 8 अज्ञात व्यक्तींपैकी एकाने त्यांना आवाज देऊन परत बोलावले.
'आमच्या दाजीला शिवीगाळ का करतो?' असे म्हणत संबंधित व्यक्तीने अक्षय यांच्याशी वाद घालण्यास सुरुवात केली. त्यानंतर दोघांनी अक्षय यांना हॉटेल समोर नेऊन त्यांच्या डोक्यात, पाठीत व तोंडावर मारहाण केली.
सात ते आठ अज्ञातांविरुद्ध गुन्हा
या प्रकरणी आष्टी पोलिस ठाण्यात 7 ते 8 अज्ञात व्यक्तींविरुद्ध गुन्हा नोंदविण्यात आला आहे. या प्रकरणाचा तपास पोलीस हवालदार भाऊसाहेब आसाराम आहेर करीत असून, परीक्षाधीन उपअधिक्षक भारत पांढरे यांच्या मार्गदर्शनाखाली अज्ञात हल्लेखोरांचा शोध सुरू असून पोलिसांपुढे मोठे आव्हान निर्माण झाले आहे.
