Ashti Taluka Car Chase Knife Attack
कडा : आष्टी तालुक्यातील हनुमंतगाव फाट्याजवळ भरदिवसा कारचा पाठलाग करून चाकूने हल्ला व मारहाण केल्याची धक्कादायक घटना घडली आहे. या घटनेत एक जण गंभीर जखमी झाला असून आरोपींनी रोख रक्कम व मोबाईल लुटून नेल्याची माहिती पोलिसांनी दिली.
पोलिसांनी दिलेल्या माहितीनुसार, शौकत ताहेर कुरेशी व त्यांचे सहकारी गुलाम हसन शेख (दोघे रा. खडकत, ता. आष्टी, जि. बीड) हे एमएच-१२ जेझेड-२३३० क्रमांकाच्या कारने जामखेडकडे बाजारासाठी जात होते. त्यावेळी मनोज फुलारी (रा. शिरगाव, ता. जि. अहमदनगर) व सागर भांबरे हे पांढऱ्या रंगाच्या बोलेरो वाहनातून त्यांच्या गाडीचा पाठलाग करत असल्याचे समोर आले.
हनुमंतगाव फाट्याजवळ पोहोचताच आरोपींनी बोलेरो वाहनाने कुरेशी यांच्या कारला मागून धडक दिली. त्यानंतर बोलेरोमधून उतरलेल्या चार ते पाच जणांनी कारची डिक्की उघडण्याचा प्रयत्न केला. याबाबत विचारणा केली असता मनोज फुलारी याने फिर्यादींच्या मुलावर चाकूने जीवघेणा हल्ला करत डोक्यात वार केला. या हल्ल्यात तो गंभीर जखमी झाला.
या प्रकरणी आष्टी पोलीस ठाण्यात गुन्हा दाखल करण्यात आला आहे. पुढील तपास पोलीस निरीक्षक शरद भुतेकर यांच्या मार्गदर्शनाखाली पोलीस उपनिरीक्षक सूर्यवंशी करत असून आरोपींचा शोध सुरू आहे.
