बीड : पांढरवाडी पुलाजवळ दुचाकी अपघातात तरुणाचा मृत्यू

गेवराई, पुढारी वृत्तसेवा : येथील पंचायत समिती कर्मचाऱ्याचा शनिवारी (दि.२४) रात्री पांढरवाडी पुलाजवळ अपघातात मृत्यू झाला. देवेंद्र मदन काकडे (रा. पांढरवाडी ता. गेवराई जि.बीड ) असे या मृताचे नाव आहे. या कर्मचाऱ्याच्या मृत्यूला कंत्राटदार जबाबदार असल्याचा आरोप मृताच्या नातेवाईकांनी केला आहे. संबधित कंत्राटदारावर गुन्हा दाखल करा, अशी मागणी करत आज (दि.२६) नातेवाईकांनी मृतदेह समोर ठेवून रस्त्यावर ठिय्या मांडला.

गेवराई तालुक्यातील मौजे पांढरवाडी येथील रहिवाशी असलेले देवेंद्र काकडे पंचायत समितीचे कर्मचारी म्हणून काम करत होते. शनिवारी रात्री काम आटपून घरी येत असताना त्यांच्या दुचाकीला अपघात झाला. पांढरवाडी पुलाजवळच्या डिव्हायडरला दुचाकी जोरात धडकल्याने त्यांचा जागीच मृत्यू झाला. हा अपघात शनिवारी रात्री दहा वाजताच्या सुमारास झाला. गेवराई उपजिल्हा रुग्णालयात आज सोमवारी (दि.२६) काकडे यांच्या मृतदेहावर शवविच्छेदन करण्यात आले.

पांढरवाडी-चकलांबा रस्त्याचे काम सुरू असून डिव्हायडरवर कोणताही बोर्ड लावण्यात आला नाही त्यामुळे हा अपघात झाला आहे, याला कंत्राटदार जबाबदार आहे, असा आरोप नातेवाईकांनी केला. दरम्यान पांढरवाडी-चकलांबा रस्त्यावर मृतदेह समोर ठेवून नातेवाईकानी आज ठिय्या आंदोलन केले. संबंधित कंत्राटदारावर गुन्हा दाखल झाल्यावशिवाय अंत्यविधी करणार नाही, असा आक्रमक पवित्रा नातेवाईकांनी घेतला.

हेही वाचा :

• Suchana Seth : चार वर्षांच्या मुलाची हत्या करणाऱ्या सूचना सेठला १४ दिवसांची न्यायालयीन कोठडी
• बुर्किना फासो येथील चर्चमध्ये गोळीबार; १५ कॅथलिक उपासकांचा मृत्यू
• पिंपळनेर : ग्रामसेवकाने केला शालकाचा खून, नंतर स्वत:च आला पोलिसांना शरण