हिंगोली : सेनगावालगत भरधाव कार हॉटेलच्या शेडमध्ये घुसली, एक ठार, एक जखमी
हिंगोली ; पुढारी वृत्‍तसेवा सेनगाव शहरालगत कोळसारोडवर भरधाव कार रस्त्यालगत असलेल्या टीनशेड मध्ये घुसल्याने भीषण अपघात झाला. या अपघातात एक जण ठार तर एक जण गंभीर जखमी झाला. आज (बुधवार) पहाटे तीन वाजण्याच्या सुमारास हा अपघात झाला. नामदेड खंडूजी हागे (वय ५८) असे मृताचे नाव असल्याचे पोलिसांनी सांगितले.
पोलिसांनी दिलेल्या माहितीनुसार, सेनगाव शहरालगत कोळसारोड भागात नामदेव हागे यांचे हॉटेल आहे. त्याच बाजूला त्यांचे घर व शेती आहे. रात्री हॉटेल बंद करून त्यांचे कुटुंबीय हॉटेलच्या शेडमध्येच झोपतात. नेहमी प्रमाणे हागे व त्यांचा नातू गोपाल हनुमान हागे (वय १०) मंगळवारी रात्री हॉटेल बंद करून शेडमध्ये झोपले होते. आज पहाटे तीन वाजण्याच्या सुमारास औरंगाबाद येथून हिंगोलीकडे भरधाव वेगाने जाणाऱ्या इर्टिगा कारच्या (क्र. एमएच-१६-एटी-६७१०) चालकाला वळणावर कारवर नियंत्रण मिळविता आले नाही. त्यामुळे कार थेट टीनशेड मध्ये घुसली. या अपघातात तेथे झापलेल्या नामदेव हागे यांचा जागीच मृत्यू झाला, तर गोपाल गंभीर जखमी झाला.
अपघाताची माहिती मिळताच सेनगाव पोलिस ठाण्याचे पोलिस निरीक्षक आर. व्ही. भोईटे, उपनिरीक्षक वग्गे, जमादार सुभाष जाधव, मारोती खांडेकर, टी. के. वंजारे, भिमराव चिखारे यांच्या पथकाने तातडीने घटनास्थळी धाव घेतली.
पोलिसांनी मृत हागे यांचा मृतदेह उत्तरीय तपासणीसाठी सेनगावच्या ग्रामीण रुग्णालयात पाठविला, तर गोपाल यास उपचारासाठी हिंगोलीच्या शासकिय रुग्णालयात हलवल्याचे पोलिसांनी सांगितले. पोलिसांनी कारमधील चौघांनाही ताब्यात घेऊन पोलिस ठाण्यात आणले आहे. सर्व व्यक्ती औरंगाबाद येथून हिंगोली येथे मित्राकडे भेटण्यासाठी जात असल्याचे त्यांनी प्राथमिक चौकशीत पोलिसांना सांगितले आहे. या प्रकरणी गुन्हा दाखल करण्याची प्रक्रिया सुरु असल्याचे पोलिसांनी सांगितले.
हेही वाचा :
