कळमनुरी, पुढारी वृत्तसेवा : आखाडा बाळापूर ते कळमनुरी मार्गावर माळेगाव शिवारात भरधाव अॅटोने बसला पाठीमागून धडक दिली. या अपघातात अॅटोतील ८ जण जखमी झाल्याची घटना शुक्रवारी सकाळी साडेअकरा वाजण्याच्या सुमारास घडली. जखमींना कळमनुरी उपजिल्हा रुग्णालयात दाखल करण्यात आले आहे. जखमींपैकी तिघांची प्रकृती गंभीर असून त्यांना पुढील उपचारासाठी हिंगोलीच्या शासकीय रुग्णालयात दाखल करण्यात आले.
हदगाव तालुक्यातील उमरी जहाँगिर येथील आठ जण ऑटोने एका कार्यक्रमासाठी कळमनुरीकडे येत होते. त्यांचा अॅटो आखाडा बाळापूर ते कळमनुरी मार्गावर माळेगाव शिवारात आला असतांना ऑटो समोरील एसटीला धडकला. या अपघातात ऑटो चालकाचे वाहनावरील नियंत्रण सुटल्याने ऑटो उलटला.
कबीर हौसाजी कदम (वय ७५), अंजनाबाई साहेबराव पाईकराव (६०), प्रितम साहेबराव पाईकराव (२५), वंदना यशवंत पाईकराव (४५), गोविंद कोंडबा पाईकराव (५), ममता प्रितम पाईकराव (२०), रंजना गोविंद पाईकराव (४०), प्रदिप यशवंत पाईकराव (१५, सर्व रा. उमरी जहाँगिर, ता. हदगाव, जि. नांदेड) हे जखमी झाले आहेत. या अपघाताची माहिती मिळताच राष्ट्रीय महामार्ग पथकाचे उपनिरीक्षक शेख उमर, सहाय्यक पोलीस उपनिरीक्षक शैलेश मुदीराज, जमादार सय्यत तय्यब, गजानन ढाले, लावणारे, सातभाई, गजभार, जोगदंड यांच्या पथकाने घटनास्थळी भेट देऊन जखमींना रुग्णवाहिकेद्वारे कळमनुरीच्या उपजिल्हा रुग्णालयात दाखल केले. वैद्यकिय अधिकारी डॉ. आनंद मेने, डॉ. संजय माहुरे यांच्या पथकाने तातडीने उपचार केले.
अपघातातील प्रदीप पाईकराव, कबीर कदम, ममता पाईकराव हे गंभीर जखमी असल्याने त्यांच्यावर प्राथमिक उपचार करून पुढील उपचारासाठी हिंगोलीच्या शासकिय रुग्णालयात हलविले आहे. या प्रकरणी उशिरापर्यंत कळमनुरी पोलिस ठाण्यात गुन्हा दाखल झाला नाही.
