उस्मानाबाद : आता होणार वर्षातून चार वेळा मतदार नोंदणी

उस्मानाबाद, पुढारी वृत्तसेवा : आतापर्यंत मतदार नोंदणीसाठी 1 जानेवारी किंवा त्यापूर्वी 18 वर्षे पूर्ण केलेल्या नागरिकांना मतदार नोंदणी करता येत होती. मात्र आता यापुढे जानेवारी, एप्रिल, जुलै आणि ऑक्टोबर या महिन्यांच्या 1 तारखेला किंवा त्याआधी ज्या नागरिकांचे 18 वर्षे पूर्ण होतील त्यांना 9 नोव्हेंबर ते 8 डिसेंबर विशेष मोहिमेंतर्गत मतदार नोंदणी करता येणार आहे.

निवडणुका पारदर्शक आणि न्याय्य वातावरणात पार पाडण्यासाठी मतदार याद्यांचे अद्ययावतीकरण अत्यंत महत्त्वपूर्ण असते. 9 नोव्हेंबर 2022 रोजी मुख्य निवडणूक अधिकारी कार्यालयाच्या संकेतस्थळावर आणि मतदार नोंदणी कार्यालयांमध्ये प्रारूप यादी प्रकाशित केली जाईल. मतदारांनी आपले नाव, पत्ता, लिंग, जन्म दिनांक, वय,
ओळखपत्र क्रमांक, मतदारसंघ आदी तपशील मतदार यादीत तपासून ते अचूक आहेत का ? याची खात्री करणे आवश्यक आहे.

बरेचदा ऐन मतदानाच्या दिवशी आपले नाव मतदार यादीत नाही, अशी तक्रार अनेक मतदारांकडून केली जाते. त्यामुळे मतदारांनी प्रारूप मतदार यादीतील आपले तपशील आताच तपासणे महत्त्वाचे आहे..9 नोव्हेंबर ते 8 डिसेंबर 2022 हा कालावधी मतदार नोंदणीचा आहे, तसा तो एखाद्याच्या नावासंबंधी हरकती घेण्याचाही आहे. एखाद्या मतदारसंघातील एखादा मतदार, यादीत दिलेल्या पत्त्यावर राहत नसेल, तर अशा नावाबद्दल त्याच मतदारसंघातील अन्य मतदार आक्षेप घेऊ शकतो. त्यामध्ये जर तथ्य आढळून आले तर पडताळणी करून संबंधित मतदाराच्या नावाची वगळणी केली जाते. मतदार याद्यांचे अद्ययावतीकरण होण्यासाठी अशा अपात्र मतदारांची वगळणीही महत्त्वाची असते.

यंदाच्या विशेष पुनरीक्षण कार्यक्रमाच्या निमित्ताने दि.19 आणि 20 नोव्हेंबर 2022 आणि दि.3 आणि 4 डिसेंबर 2022 या दिवशी राज्यभर विशेष शिबिरांचे आयोजन केले जाणार आहे. तसेच वंचित घटकांसाठी खास शिबिरांचे आयोजन करण्यात येणार आहे. महिला आणि दिव्यांग यांच्या नाव नोंदणीसाठी दि.12 आणि 13 नोव्हेंबर 2022 रोजी, तर दि.26 आणि 27 नोव्हेंबर 2022 रोजी तृतीयपंथी नागरिक, देह व्यवसाय करणार्‍या महिला आणि घर नसलेले भटक्या आणि विमुक्त जमातीचे नागरिक यांच्या नाव नोंदणीसाठी राज्यभर विशेष शिबिरे घेतली जातील. तसेच तरुण मतदारांपर्यंत पोहोचण्यासाठी राष्ट ?ीय सेवा योजना, राष्ट ?ीय छात्र सेना, नेहरू युवा केंद्र संघटन, भारत स्काऊट यांच्या सहकार्याने राज्यभर मतदार नोंदणीची शिबिरे राबवण्यात येणार आहेत. शिवाय,
मतदार नोंदणी, नाव वगळणी, तपशिलातील दुरुस्त्या या सुविधा NVSP, Voter Portal या संकेतस्थळावर आणि Voter Helpline या मोबाइल अ‍ॅपवर उपलब्ध आहेत. ग्राम विकास आणि पंचायतराज विभागाच्या सहकार्याने दि.10 नोव्हेंबर 2022 रोजी राज्यभर विशेष ग्रामसभेचे आयोजन केले जाणार आहे.

या दिवशी राज्यभरातील ग्रामसभांमध्ये मतदार यादीचे वाचन केले जाईल. त्यांतर्गत नव्याने नाव नोदणीस पात्र
नागरिक, लग्न होऊन गावात आलेल्या स्त्रिया, गावात कायमस्वरूपी नव्याने वास्तव्यास आलेले नागरिक यांची नाव नोंदणी केली जाईल. तसेच दुबार नावे, मृत व्यक्ती, गावातून कायमस्वरूपी स्थलांतरित झालेल्या व्यक्ती, लग्न होऊन अन्य गावात गेलेल्या स्त्रिया यांच्या नावांची मतदार यादीतून वगळणी केली जाईल.मतदार नोंदणीसाठी पात्र युवांनी मतदार यादीत आपले नाव नोंदवावे, तसेच प्रत्येक मतदाराने प्रारूप मतदार यादीतील आपले तपशील अचूक आहेत का ? याची खात्री करून घ्यावी, असे आवाहन जिल्हाधिकारी तथा जिल्हा निवडणूक अधिकारी डॉ.सचिन
ओम्बासे आणि उपजिल्हा निवडणूक अधिकारी शुभांगी आंधळे यांनी केले आहे.