रेंदाळ; पुढारी वृत्तसेवा : रांगोळी येथील लोकनियुक्त सरपंच नारायण भोसले यांचे सरपंचपद अखेर अपात्र ठरले आहे. अतिक्रमण केल्याच्या कारणावरून त्यांना अपात्र केल्याचा आदेश जिल्हाधिकारी यांनी दिला आहे.
२०१७ मध्ये झालेल्या पंचवार्षिक निवडणुकीत भोसले हे पहिले लोकनियुक्त सरपंच म्हणून विजयी झाले होते. दोन वर्षांपूर्वी मनमानी कारभार करतात हा ठपका ठेऊन 13 सदस्यांनी त्यांच्यावर अविश्वास ठराव दाखल केला होता. तेव्हा भोसले यांचे सरपंचपद अबाधित राहिले होते. माजी ग्रा.पं. सदस्य बापूसो मुल्लाणी यांनी सरपंच भोसले यांनी अतिक्रमण केल्याची तक्रार दाखल केली होती. जिल्हाधिकारी यांच्या आदेशावरून भूमिअभिलेख हातकणंगले यांनी मोजणी केली असता त्यामध्ये अतिक्रमण केल्याचे सिद्ध झाले. कोणतेही म्हणणे व कागदपत्रे हजर न झाल्याने अतिक्रमण असल्याचे सिद्ध झाल्याने सरपंच भोसले यांचे पद अपात्र ठरविले.
