पोर्ले तर्फ ठाणे, पुढारी वृत्तसेवा : कोल्हापूर-रत्नागिरी महामार्गावर पडवळवाडी नजीक चार चाकी गाडीने समोरून येणार्या दुचाकीला विरुद्ध दिशेला जाऊन धडक दिली. या धडकेत दुचाकीस्वार प्रशांत संभाजी भोसले (वय 28, रा.सातवे, ता. पन्हाळा) जागीच ठार झाला, तर मोटारीतील चालकासह चौघेजण जखमी झाले. जखमींना खासगी दवाखान्यात दाखल करण्यात आले आहे. गुरुवारी सकाळी अकराच्या सुमारास हा अपघात झाला.
प्रशांत भोसले गोकुळ दूध संघात सुपरवायझर होते. सकाळी आळवे येथील एका दूध संस्थेला भेट देऊन संघाच्या गोगवे सेंटरकडे जात असताना वाघबीळ घाटाच्या सुरुवातीला हॉटेल ग्रीनपार्क समोर रत्नागिरीहून कोल्हापूरला जाणारी मोटारीने भोसले यांच्या दुचाकीस जोराची धडक दिली. धडक एवढी जोरदार होती की दुचाकीसह भोसले यांना 40 ते 50 फूट फरफटत नेले. या अपघातात दुचाकीचा चक्काचूर झाला असून मोटारीचे मोठे नुकसान झाले आहे. भोसले याच्या मागे आई, वडील, भाऊ असा परिवार आहे. या अपघाताची माहिती करवीर पोलिस ठाण्यात पडवळवाडीचे माजी उपसरपंच पंडित नलवडे यांनी दिली.
