सरूड : पुढारी वृत्तसेवा : सोनवडे-बांबवडे (ता. शाहूवाडी) येथील अथणी शुगर प्रायव्हेट लि. (युनिट २) कारखान्याकडे साखरेची वाहतूक करण्यासाठी कर्नाटकातून आलेले काही ट्रक स्वाभिमानी शेतकरी संघटनेच्या कार्यकर्त्यांनी रोखली. त्यानंतर संबंधित वाहतूकदारांना शेतकऱ्यांच्या आंदोलनाची भूमिका समजावून माघारी पाठविले. (Athani sugar)
संबंधित बातम्या
दरम्यान, अथणी शुगर प्रशासनाने स्वाभिमानीचे माजी खा. राजू शेट्टी यांना एक पत्र लिहून त्यामध्ये गत गळीत हंगामातील ऊस पुरवठादार शेतकऱ्यांना कारखान्यामार्फत दरवर्षी प्रमाणे सवलतीच्या दरातील टनेज वरील सुमारे ३ हजार ७९६ क्विंटल साखरेचे वितरण करण्यात येणार आहे. यामध्ये संघटनेच्या माध्यमातून सुरू असलेल्या आंदोलनाचा अडथळा होऊ नये. तसेच शेतकऱ्यांची गैरसोय टाळण्याची विनंती केली आहे.
मात्र, संघटनेच्या स्थानिक कार्यकर्त्यांनी कारखाना प्रशासनाची विनंती धुडकावून लावत साखर, स्पिरिट यासह अन्य उपपदार्थ वाहतुकीची वाहने कोणत्याही परिस्थितीत कारखान्यातून बाहेर पडू दिली जाणार नसल्याचे ठणकावले. यावेळी शाहूवाडी पोलिसांच्या संरक्षणामध्ये सदरची साखर वाहतूक करण्याच्या अथणी प्रशासनाच्या हालचाली दिसताच तालुक्यातील स्वाभिमानी संघटनेचे कार्यकर्ते बांबवडे येथे एकत्र जमा झाले होते. यामुळे काही स्थानिक साखर खरेदीदार तसेच परप्रांतीय वाहतुकदारांची वाहने खोळंबून राहिल्याचे दिसून आले.
हेही वाचा
