Shiroli Tanker Brake Failure
शिरोली एमआयडीसी : शिरोली औद्योगिक वसाहतीतील पोलीस ठाण्याशेजारी मंगळवारी सायंकाळी एका ऑइल टँकरचा अपघात झाला. ब्रेक निकामी झाल्याने हा टँकर नियंत्रण सुटून पलटी झाला. टँकरमधील जवळपास तीन टन तेल गळाल्याने लाखो रुपयांचे नुकसान झाले. मात्र, अपघाताच्या ठिकाणी महावितरणचा मोठा ट्रान्सफॉर्मर असूनही सुदैवाने मोठा अनर्थ टळला.
मिळालेल्या माहितीनुसार, सायंकाळी साडेसहा ते सातच्या सुमारास ऑइल उतरण्यासाठी टँकर संबंधित कंपनीत येत होता. प्रवेशद्वाराजवळील चढ चढताना चालकाने गियर बदलण्यासाठी ब्रेक लावला; पण ब्रेक निकामी झाल्याने टँकर मागे सरकला. तो रस्त्याच्या कडेला असलेल्या चरीत जाऊन पलटी झाला.
या घटनेच्या ठिकाणापासून अवघ्या काही फुटांवर महावितरणचा ट्रान्सफॉर्मर व बीएसएनएलच्या केबल्स होत्या. टँकर त्या खांबावर आदळला असता, भीषण अपघात घडला असता. सुदैवाने ते टळले. या घटनेत टँकर चालक किरकोळ जखमी झाला असून त्याला तातडीने शासकीय रुग्णालयात दाखल करण्यात आले. अपघाताची नोंद शिरोली एमआयडीसी पोलिस ठाण्यात करण्यात आली आहे.
