नागाव : महामार्गावरील पुलाची शिरोली येथील सांगली फाटा येथे उड्डाणपुलावर बुधवारी सायंकाळी चार वाजण्याच्या सुमारास भीषण अपघात झाला. अपघातात एका अज्ञात वाहनाने मालवाहतूक रिक्षाला जोरदार धडक दिल्याने रिक्षा चालक गंभीर जखमी झाला असून रिक्षाचे मोठे नुकसान झाले आहे. या अपघातामुळे महामार्गावरील वाहतूक तब्बल चार तास विस्कळीत झाली होती.
मिळालेल्या माहितीनुसार रिक्षा चालक गोकुळ शिरगाव औद्योगिक वसाहतीमधील एका कंपनीतून कास्टिंग घेऊन शिरोलीकडे येत होता. दरम्यान सायंकाळी चार वाजण्याच्या सुमारास पुलाची शिरोली सांगली फाटा उड्डाणपुलावर एका अज्ञात वाहनाने रिक्षाला पाठीमागून जोराची धडक दिली. या धडकेत रिक्षा महामार्गावरच पलटी झाली.
अपघाताची माहिती मिळताच शिरोली पोलिसांनी तातडीने घटनास्थळी धाव घेवून अपघातग्रस्त रिक्षा बाजूला करून वाहतूक सुरळीत करण्याचा प्रयत्न केला. मात्र, सध्या महामार्गाचे काम सुरू असल्याने आणि अपघातामुळे लागलेल्या रांगांमुळे रात्री आठवाजेपर्यंत या महामार्गावर वाहतूक कोंडी निर्माण झाली होती. सुमारे चार तास वाहनधारकांना या कोंडीचा मनस्ताप सहन करावा लागला
