हातकणंगले : रेल्वे रुळावरून हेडफोनवर बोलत जात असताना रेल्वेने जाेराची धडक दिल्याने अनुष्का संतोष पोवार (वय १७, रा. वेताळपेठ, इचलकरंजी) या तरुणीचा मृत्यू झाला. हातकणंगले येथील डॉ. बाबासाहेब आंबेडकर वसतिगृहासमोर बुधवारी सकाळी ११.४५ वा. ही घटना घडली.
अनुष्का व दोन मैत्रिणी रुळावरून चालत जात होत्या. अनुष्का हेडफोन घालून फोनवर बोलत चालली होती. मागून येणार्या ‘धनबाद एक्स्प्रेस’चा तिला अंदाज आला नाही. रेल्वे येताच मैत्रिणींनी तिला आवाज देण्याचा प्रयत्न केला. मात्र, त्यांचा आवाज अनुष्कापर्यंत पोहोचला नाही. मैत्रिणी दहा फुटांवर असतानाच ‘धनबाद एक्स्प्रेस’ची धडक अनुष्काला बसली. त्यात अनुष्काच्या डोक्याचा चेंदामेंदा झाला. अनुष्काला उपचारांसाठी ग्रामीण रुग्णालयात दाखल करण्यात आले. मात्र, उपचारांपूर्वीच तिचा मृत्यू झाला. अधिक तपास हातकणंगले पोलिस करत आहेत.
