Gokul 1200 Milk Societies Hearing
आशिष पाटील
गुडाळ : कोल्हापूर जिल्ह्याच्या राजकीय व सहकार क्षेत्राचे लक्ष लागून राहिलेल्या गोकुळ दूध संघाशी संबंधित 1200 प्राथमिक दूध संस्थांच्या प्रकरणाची उच्च न्यायालयाच्या कोल्हापूर सर्किट बेंचमधील सुनावणी पुन्हा एक आठवड्यासाठी पुढे ढकलण्यात आली आहे. त्यामुळे मतदार यादी तयार करण्याचा कार्यक्रमही लांबण्याची शक्यता आहे.
शनिवारी (दि. 7) झालेल्या सुनावणीदरम्यान न्यायालयाने सरकारी वकिलांना 1200 संस्थांच्या अवसायनासंदर्भातील आदेशाला स्थगिती देण्याबाबत मंत्र्यांकडून मंत्रालयात झालेला पत्रव्यवहार सोमवारी न्यायालयात सादर करण्याचे निर्देश दिले होते.
मात्र, हा पत्रव्यवहार सादर करण्यासाठी अधिक वेळ लागणार असल्याने सरकारी वकिलांनी न्यायालयाकडे एक आठवड्याची मुदत देण्याची विनंती केली. न्यायालयाने ही विनंती मान्य केल्यामुळे या प्रकरणातील पुढील सुनावणी आठवडाभर लांबणीवर पडली आहे.
दरम्यान, गोकुळशी संलग्न प्राथमिक दूध संस्थांकडून ठराव मागवून मतदार यादी तयार करण्याची प्रक्रिया देखील यामुळे पुढे ढकलली जाणार असल्याचे स्पष्ट झाले आहे. या न्यायालयीन प्रक्रियेच्या पार्श्वभूमीवर गोकुळ दूध संघाची निवडणूक नियोजित वेळेत होणार का, याबाबत आता प्रश्नचिन्ह निर्माण झाले आहे.
