Kolhapur News | कांडगाव–शेळकेवाडी मार्गावर गव्यांचे दर्शन; परिसरात भीतीचे वातावरण
Kolhapur News
करवीर तालुक्यातील कांडगाव ते शेळकेवाडी दरम्यानच्या वास ओढा परिसरात मंगळवारी रात्री अचानक गव्यांचे दर्शन झाल्याने स्थानिक ग्रामस्थांमध्ये दहशतीचे वातावरण निर्माण झाले आहे. सायंकाळी सुमारे सातच्या सुमारास दोन ते तीन गवे रस्त्याच्या अगदी काठावर दिसून आले. काही क्षण थांबून ते लगेचच महे गावाच्या दिशेने असलेल्या उसशेतीत निघून गेले.
गव्यांचे अचानक झालेल्या या भेटीमुळे परिसरातील शेतकरी आणि नागरिक तणावात असून, रात्रीच्या वेळी ये-जा करणाऱ्यांना विशेष खबरदारी घेण्याची सूचना ग्रामस्थ देत आहेत. वन्यप्राण्यांचे गावाजवळ वाढते अस्तित्व लक्षात घेता, अशा घटनांची वारंवारता वाढली असल्याचा नागरिकांचा दावा आहे.
घटनेची माहिती तात्काळ वन विभागाला देण्यात आली. ग्रामस्थांनी वन विभागाच्या पथकाने परिसरात गस्त वाढवावी, तसेच गव्यांच्या हालचालींवर लक्ष ठेवून नागरिकांना वेळोवेळी सूचना द्याव्यात, अशी मागणी केली आहे.
वन विभागाकडून प्राथमिक तपास सुरू असून, गव्यांचा कळप कोणत्या दिशेने परिसरात आला, तसेच त्या भागात त्यांच्या उपस्थितीचे कारण काय असू शकते, याबाबत चौकशी केली जात आहे. उसशेती, दाट झाडी आणि पाण्याच्या उपलब्धतेमुळे या भागात गव्यांचे अस्तित्व वाढत असल्याचे स्थानिकांचे मत आहे.
गव्यांची वाढती हालचाल पाहता गावकऱ्यांनी संध्याकाळी आणि रात्री एकटे प्रवास करू नये, शेतात जाण्यापूर्वी आसपासची पाहणी करावी, असे आवाहन करण्यात आले आहे. वन विभागानेही ग्रामस्थांची भीती दूर करण्यासाठी लवकरच जनजागृती मोहिम राबवण्याचे संकेत दिले आहेत.
