अब्दुल लाट : पुढारी वृत्तसेवा : अब्दुललाट (ता. शिरोळ) येथे महावितरणचे अनेक हाय व्होल्टेज डीपी उघड्यावर पडले आहेत. तर या डीपीचे पोल सुध्दा वाकले आहेत. त्यामुळे पोल कोणत्याही क्षणी कोसळून मोठी दुर्घटना होण्याची शक्यता आहे. याबाबत ग्रामस्थांनी महावितरणाला माहिती देऊनही दुर्लक्ष करण्यात येत आहे.
घडसे मळा येथील डीपी जमिनीपासून अगदी कमी उंचीवर उघड्यावर पडले आहेत. पोल कललेले आहेत. त्यामुळे ट्रान्सफार्मर, डीपी यांना शॉर्टसर्किट होऊ शकतो. या डीपीजवळून लहान मुले व शेतकरी जनावरे घेऊन जातात. तसेच शेकडो एकरांतील ऊस शेतीला मोठा धोका निर्माण होण्याची शक्यता नाकारता येत नाही.
महावितरणच्या दुर्लक्षितेमुळे या ठिकाणी कोणतीही दुर्घटना झाली. तर सर्वस्वी महावितरण जबाबदार असेल. त्यामुळे अजून देखील वेळ गेलेली नाही. तत्काळ डीपी आणि पोलची दुरुस्ती करण्यात यावी.
- सोमेश संजय पाटील, शेतकरी
