निपाहवरील भारतीय बनावटीच्या लसनिर्मितीचे प्रयत्न

कोल्हापूर :  कोरोना काळात भारतीयांसह संपूर्ण जगाला दिलासा देणारी मोठी कामगिरी करणाऱ्या पुण्याच्या सिरम इन्स्टिट्यूट ऑफ इंडिया या जगातील सर्वात मोठ्या लसनिर्मिती कंपनीच्या गळ्यात निपाह विषाणूच्या मुसक्या बांधण्यासाठी धनुष्यबाण अडकविण्याची तयारी सुरू झाली आहे.

सूत्रांच्या माहितीनुसार भारतीय आयुर्विज्ञान संशोधन संस्थेने (आयसीएमआर) याविषयी सिरमच्या उच्चाधिकाऱ्यांबरोबर चर्चा सुरू केली आहे. गोपनीय झालेली ही चर्चा फलदायी ठरली, उत्तर भारतीय बनावटीची निपाह विषाणूवरील पहिली लस उपलब्ध करण्याचा मान सिरमकडे जाऊ शकतो. सध्या तरी सिरमने याविषयी कोणतेही अधिकृत भाष्य करण्यास नकार दिला आहे..

भारतामध्ये सप्टेंबरच्या पूर्वार्धामध्ये निपाह व्हायरसचा प्रादुर्भाव आढळून आला. कोल्हापूर जिल्ह्यातील इचलकरंजी येथे चार रुग्णांना, तर केरळमधील कोझीकोडे जिल्ह्यात एकाच कुटुंबातील चार व्यक्तींना निपाह विषाणूची बाधा झाल्यावर आयसीएमआरने शिक्कामोर्तब केले होते. यानंतर केरळमध्ये सरकारने आणीबाणीची स्थिती जारी केली. निपाह विषाणूचा सामना करण्यासाठी स्वतंत्र कक्ष निर्माण केले आणि समान लक्षणे दिसणाऱ्या रुग्णांच्या तपासण्याही मोठ्या प्रमाणात सुरू केल्या. यामध्ये केरळमधील एक रुग्ण गंभीर बनला होता.