कोल्हापूर, पुढारी वृत्तसेवा : जिल्ह्यातील 86 ग्रामपंचायतींच्या सार्वत्रिक आणि 51 ग्रामपंचायतींच्या 78 रिक्त जागांसाठी शुक्रवारी प्रभागनिहाय अंतिम मतदार याद्या प्रसिद्ध करण्यात आल्या. यामुळे येत्या आठ-दहा दिवसांत निवडणूक कार्यक्रम जाहीर होऊन सप्टेंबरमध्ये प्रत्यक्ष निवडणुका होण्याची शक्यता आहे.
जून ते डिसेंबरअखेर मुदत संपणार्या जिल्ह्यातील 86 ग्रामपंचायतीच्या सार्वत्रिक निवडणुका आहेत. यामध्ये गारगोटी, सरवडे, कसबा वाळवे, बाजार भोगाव, वाशी, चिंचवाड आदी महत्त्वांच्या ग्रामपंचायतींचा समावेश आहे. सार्वत्रिक निवडणुकांसह थेट सरपंच पदाच्या चार रिक्त जागांसह 51 ग्रामपंचायतींच्या 78 जागांसाठी पोटनिवडणुकाही होणार आहेत. यामध्ये चंदगड तालुक्यातील सर्वाधिक 20 रिक्त जागांचा समावेश आहे. शाहूवाडी तालुक्यातील 17, करवीर तालुक्यातील 10 रिक्त जागांचा समावेश आहे.
या निवडणुकांसाठी प्रसिद्ध केलेल्या प्रारूप मतदार याद्यांवर द्21 ऑगस्टपर्यंत हरकत घेण्याची मुदत होती. या कालावधीत 28 ग्रामपंचायतींच्या मतदार याद्यावर एकूण 115 हरकती दाखल झाल्या होत्या. या हरकतींवर निर्णय होऊन शुक्रवारी या प्रभागनिहाय मतदार याद्या अंतिम करण्यात आल्या.
सार्वत्रिक निवडणुका होणार्या ग्रामपंचायती
आजरा : मेंढोली, मसोली, बुरुडे, सुलगाव, पेरणोली, वेळवट्टी, देऊळवाडी, हरपवडे. करवीर : चिंचवाड, शिरोली दुमाला, केकतवाडी, वाशी, सांगवडेवाडी, निटवडे, गणेशवाडी, जठारवाडी, धोंडेवाडी, बहिरेश्वर. गडहिंग्लज : अर्जुनवाडी. चंदगड : कडलगे खुर्द, जट्टेवाडी, कलिवडे, कोदाळी, शिरोली, भोगोली, कानुर खुर्द, उमगाव, लाकूरवाडी, शिवनगे, सडेगुडवळे, कुरणी, तुर्केवाडी, बुजवडे, तांबूळवाडी, आंबेवाडी, माणगाव, मुरकुटेवाडी, उत्साळी, मिरवेल,अमरोली, गणूचीवाडी.
पन्हाळा : वाळवेकरवाडी, बाजार भोगाव, काटे भोगाव, देवठाणे, माजगाव, सुळे, माळवाडी, कोदवडे, बादेवाडी, महाडिकवाडी, शिंदेवाडी, कसबा ठाणे, खोतवाडी, बोरीवडे. भुदरगड : हणबरवाडी, चांदमवाडी, निष्णप, गारगोटी, शिंदेवाडी, कोंडोशी, पिंपळगाव. राधानगरी : मांगेवाडी, सरवडे, रामणवाडी, फेजिवडे, बारवाडी, चक्रेश्वरवाडी, कसबा वाळवे, मालवे, न्यू करंजे, चांदेकरवाडी, फराळे,पालकरवाडी.
शाहूवाडी : मालेवाडी, सावर्डे खुर्द, सुपात्रे, सावे, शेंबवणे, वालूर, माण, कासार्डे, ऐनवाडी, गेळवडे, गावडी, आकुर्ळे.
