गर्भपाताची माहिती न देणार्या पती - पत्नीवर कारवाई करा : जिल्हाधिकारी राहुल रेखावार
कोल्हापूर, पुढारी वृत्तसेवा : बारा आठवड्यांनंतर झालेल्या गर्भपाताची खरी माहिती न देणार्या पती-पत्नीसह कुटुंबीयांवरही गर्भधारणा पूर्व व प्रसवपूर्व निदान तंत्र (लिंग निवडीस प्रतिबंध) अधिनियमानुसार (पीसीपीएनडीटी) कारवाई करा, असे आदेश जिल्हाधिकारी राहुल रेखावार यांनी दिले.
‘पीसीपीएनडीटी’च्या जिल्हास्तरीय दक्षता पथक समितीची बैठक झाली. या बैठकीत या कायद्याची प्रभावी अंमलबजावणी करा, अशी सूचना रेखावार यांनी केली. ते म्हणाले, पहिले अपत्य एक किंवा दोन मुली असणार्या गरोदर मातेचा 12 आठवड्यांनंतर गर्भपात झाल्याचे निदर्शनास आल्यास, अशा महिलांच्या गर्भपाताबाबतची योग्य ती माहिती आरोग्य विभागाने घ्यावी. या महिलेचा गर्भपात कोठे व कशामुळे झाला आदींची सत्य माहिती दिली नाही तर संबंधित पती- पत्नी व कुटुंबीयांवर कायदेशीर कारवाई करा.
जिल्ह्यातील सोनोग्राफी व गर्भपात केंद्रांची नियमित तपासणी करा. ज्या सोनोग्राफी केंद्रांत सीसीटीव्ही कॅमेरे नाहीत, तिथे तत्काळ ते बसवून कार्यान्वित करा. गरोदर महिलांची पहिल्या तिमाहीची वेळेत नोंदणींची खात्री करा. नोंदीची माहिती खासगी सोनोग्राफी केंद्रधारकांनी आरोग्य विभागाला द्यावी, असे सांगत खासगी वैद्यकीय व्यवसाय करणार्या बोगस डॉक्टरांविरुद्ध कारवाई करा.
बैठकीला जिल्हा महिला व बाल विकास अधिकारी शिल्पा पाटील, सीपीआरच्या निवासी वैद्यकीय अधिकारी डॉ. हर्षला वेदक, अतिरिक्त जिल्हा आरोग्य अधिकारी उत्तम मदने, पीसीपीएनडीटी कायदा सल्लागार गौरी पाटील तसेच समिती सदस्य उपस्थित होते.