खवय्यांना नवीन पदार्थ म्हटला की त्याचा आस्वाद घेतल्याशिवाय रहावत नाही. देशाच्या वेगवेगळ्या भागात वेगवेगळी खाद्यसंस्कृती आपल्याला दिसून येते. कोल्हापूरचा तांबडा पांढरा रस्सा देशभरात प्रसिद्ध आहे. कोल्हापूर जिल्ह्यात आणखी एक अनोखा पदार्थ प्रसिद्ध आहे तो म्हणजे दुधाची आमटी. मुख्यतः राधानगरी तालुक्यात बनविली जाणारी दुधाची आमटी खूप चविष्ट असते. तुम्हीही घरी दुधाची आमटी बनवू शकता. (Recipe of Dudhachi Aamti)
साहित्य
१. दूध १ लिटर
२. तीळ ३० ग्रॅम
३. जिरे १० ग्रॅम
४. खोबरे एक वाटी
४. गरम मसाला १० ग्रॅम
५. मिरची पावडर ४ ते ५ चमचे
६. हळद १ चमचा
७. आले दीड इंच
८. लसूण १० ते १५ पाकळ्या
९. कोथिंबीर- गरजेनुसार
१०. कांदा २ मोठे
११. कसुरी मेथी एक छोटा चमचा
१२. टोमॅटो १
कृती (Recipe of Dudhachi Aamti)
१. कसुरी मेथी सोडून वरील सर्व एकत्र वाटण करणे.
२. कांदा तेलात परतून घेऊन त्यात वाटलेला मसाला तेल सुटेपर्यंत परतून घ्यावा.
३. अगोदर गरम केलेल दूध त्यात मिसळा आणि १० मिनिटे शिजवत ठेवा. सतत ढवळत रहावे.
४. सर्व्ह करतानाच दुधाच्या आमटीत मिठाचा वापर करावा.
टिप..
दुधाची आमटी करण्यासाठी चांगलं घट्ट असं दूध हवे. दूध चांगलं तापवून घेतलेलं हवं. एक लीटर आमटी करण्यासाठी कोल्हापुरी मटण रस्स्यासाठी जो मसाला आपण वापरतो तोच वापरावा. त्यात फक्त कोल्हापुरी मिरची मसाल्याचा (चटणी) वापर करु नये. कारण त्यात मिठाचा वापर केलेला असतो. त्यामुळे आमटी शिजत असताना त्याचा वापर केला तर दूध फाटण्याची शक्यता असते. तसेच दूध आमटी शिजत असताना त्यात थेट मीठ घालू नका.
तुम्हाला तिखटपणा हवा असेल तर काळ्या मिरीचे चार दाणे वाटणामध्ये टाकावेत. दुधाला चांगली उकळी आली की त्यात वाटलेला मसाला घालावा. त्यात तुम्हाला वेगळा फ्लेवर द्यायचा असेल तर कसुरी मेथीचा वापर करा.
आमटी सर्व्ह करत असताना त्यात आपल्याला चवीनुसार मीठ घालावे. मीठ थेट दूध आमटी शिजत असताना टाकलं तर दूध फाटू शकते.
दुधाची आमटी बनवत असताना काश्मिरी मिरची पावडरचादेखील वापर केला तरी चालेल.
