कोल्हापूर : पुढारी वृत्तसेवा : कोल्हापूर विमानतळासाठी अतिरिक्त 64 एकर जागेच्या भूसंपादनाची प्रक्रिया डिसेंबर अखेर पूर्ण होईल, असे महाराष्ट्र विमानतळ विकास कंपनीचे अपर जिल्हाधिकारी दीपक नलवडे यांनी सोमवारी सांगितले. कोल्हापूर विमानतळाला मोठी संधी आहे, त्यानुसार विमानतळाच्या विस्तारीकरणासाठी आवश्यक जागा उपलब्ध करून देण्यासाठी कंपनीने प्राधान्य दिल्याचे त्यांनी सांगितले.
नलवडे म्हणाले, कोल्हापूर विमानतळ धावपट्टी विस्तारीकरणासाठी अतिरिक्त 64 एकर जागेची आवश्यकता आहे. याकरिता 212 कोटी रुपयांचा निधी मंजूर केला आहे. त्यापैकी 103 कोटी रुपये राज्य शासनाने उपलब्ध करून दिले आहेत. मौजे मुडशिंगी येथील 1 हजार 69 खातेदार तर तामगाव येथील 5 खातेदार जागा मालकांची एकूण 64 एकर जागा संपादित केली जाणार आहे. ही संपादन प्रक्रिया डिसेंबर अखेर पूर्ण होईल, असे नियोजन केले आहे.
राज्यात मुंबई, नागपूर, पुणे, औरंगाबाद आणि शिर्डी नंतर कोल्हापूर विमानतळाचा सध्या क्रमांक लागतो. यामुळे कोल्हापूर विमानतळाला मोठी संधी आहे. जमीन संपादनाचे काम पूर्ण झाल्यानंतर मोठी विमाने उतरण्याची सुविधा विर्माण होईल, परिणामी कोल्हापूरचे विमानतळ जगाच्या नकाशावर येणार असल्याचे नलवडे यांनी सांगितले. त्यामुळे कोल्हापूरसह शिर्डी, नाशिक आणि नांदेड विमानतळाच्या विकासासाठी प्रयत्न सुरू असल्याचे त्यांनी सांगितले.
राज्यातील नऊ विमानतळांचा केंद्र शासनाच्या उडाण योजनेत समावेश आहे. यापैकी गोंदिया, जळगाव, नाशिक, कोल्हापूर, नांदेड आणि चिपी, सिंधुदुर्ग या सहा विमानतळावरून विमानसेवा सुरू आहेत. रत्नागिरी, अमरावती आणि सोलापूरमधून अद्याप विमानसेवा सुरू झालेली नाही. कंपनीकडून रत्नागिरी, औरंगाबाद, अकोला, अमरावती, जळगाव या विमानतळासाठी भूसंपादन सुरू आहे. अमरावतीचे भूसंपादन मार्च 2023 पर्यंत पूर्ण होईल. सोलापूरमध्ये विमानतळाशेजारील एका साखर कारखान्याच्या चिमणीचा प्रश्न असल्याचेही त्यांनी सांगितले.
