गडहिंग्लज : पुढारी वृत्तसेवा
निलजी (ता. गडहिंग्लज) येथील लक्ष्मी कलगोंडा पाटील (वय 27) या नवविवाहितेने गुरुवारी (दि. 2) पहाटेच्या सुमारास मडी नावाच्या शेतातील विहिरीत उडी घेऊन आत्महत्या केली. अवघ्या सहा महिन्यांपूर्वी विवाह झालेल्या लक्ष्मीने आत्महत्या केल्याचे लक्षात येताच माहेरच्या मंडळींनी निलजी येथे येऊन जोरदार राडा केला.
यामध्ये पतीसह सासरच्यांनाही धक्काबुक्की करण्यात आली. याबरोबरच घरालगतच अंत्यविधी करण्यावरूनही माहेरच्यांनी ताणून धरल्याने सायंकाळपर्यंत अंत्यविधीही झाला नव्हता. अखेर रात्री उशिरा त्याच ठिकाणी अंत्यसंस्कार करण्यात आले. दरम्यान, पती कलगोंडा सिद्धगोंडा पाटील (वय 33), सासू लक्ष्मी सिद्धगोंडा पाटील (55), सासरा सिद्धगोंडा मारुती पाटील (68), नणंद कावेरी सिद्धगोंडा पाटील (30, सर्व रा. निलजी, ता. गडहिंग्लज) यांच्यावर गुन्हा दाखल करून अटक करण्यात आली.
लक्ष्मीचे काका सुंदर पाटील यांनी दिलेल्या फिर्यादीवरून पतीसह सासरच्या चार जणांवर आत्महत्येस प्रवृत्त केल्याप्रकरणी गुन्हा दाखल झाला आहे. हुक्केरी तालुक्यातील सुलतानपूर येथील लक्ष्मी हिचा विवाह नोव्हेंबर 2021 मध्ये निलजी येथील कलगोंडा पाटील याच्याशी झाला होता. कलगोंडा हा संकेश्वर येथे खासगी संस्थेत नोकरीस आहे. गुरुवारी सकाळी लक्ष्मी हिने मडी नावाच्या शेतातील विहिरीत उडी घेऊन आत्महत्या केली. याबाबत माहेरच्या मंडळींना माहिती कळताच 7.30 च्या सुमारास त्या ठिकाणाहून मोठ्या प्रमाणावर लोक येऊन त्यांनी लक्ष्मी हिच्या पतीसह घरच्यांना जाब विचारत जोरदार धक्काबुक्की केली. याची माहिती मिळताच पोलिस घटनास्थळी दाखल झाले. त्यांनी सर्वांनाच पोलिस ठाण्याकडे आणले. त्यानंतर सिदपाटील यांनी अज्ञात कारणावरून लक्ष्मी हिने आत्महत्या केल्याचे फिर्याद दिली. लक्ष्मी हिच्या माहेरच्यांनी मात्र आपल्या मुलीला दोन लाख रुपये व दोन तोळे दागिन्यांसाठी शारीरिक व मानसिक छळ करून तिला आत्महत्येसाठी प्रवृत्त केल्याचा आरोप केला. संबंधितांना अटक होत नाही तोवर मृतदेह ताब्यात घेणार नसल्याची भूमिका त्यांनी घेतली. अखेर पोलिसांनी माहेरच्या मंडळींची फिर्याद दाखल करून घेतली.
