नांदगाव : मुंबई-गोवा महामार्गावर नांदगाव-मोरयेवाडी येथे गुरुवारी सहा आसनी मॅजिकला टेम्पो ट्रॅव्हल्सने पाठीमागून धडक दिली. या अपघातात सहा आसनीमधून कणकवली येथे जाणारे 6 शाळकरी विद्यार्थी जखमी झाले. हा अपघात गुरुवारी सकाळी 8 वा. च्या सुमारास झाला. धडक दिलेल्या वाहनचालकाने अपघातानंतर न थांबता पलायन केले.
सहा सीटर मॅजिक वाहन नांदगाव येथून आयडियल इंग्लिश स्कूलच्या विद्यार्थ्यांना घेऊन कणकवलीला जात होते. हे मॅजिक मोरयेवाडीजवळ आले असता भरधाव येणार्या टेम्पो ट्रॅव्हल्सने त्याला जोरदार धडक दिली. धडक दिल्यानंतर टेम्पो ट्रॅव्हल्ससह चालक पळून गेला. या अपघातात मॅजिक गाडीचेही मोठे नुकसान झाले आहे.
अपघातात मॅजिकमधील असद सिराज साटविलकर (वय 13, नांदगाव), जानवी कापसे (15), रेहान मौसीन नावलेकर (11), सुफियान मौसीन नावलेकर (9), मुस्ताहिन मोबिन मोबिलकर (16), दिशा जयवंत बिडये (15) हे विद्यार्थी जखमी झाले. जखमी विद्यार्थ्यांना उपचारासाठी उपजिल्हा रुग्णालय आणि काही खासगी रुग्णालयात दाखल करण्यात आले. अपघाताची माहिती मिळताच कणकवली पोलिस तातडीने घटनास्थळी दाखल झाले. त्यांनी पंचनामा करून जखमी विद्यार्थ्यांना मदत केली. पळून गेलेल्या टेम्पो ट्रॅव्हल्सचा शोध पोलिस घेत आहेत.
