सावंतवाडी ः शिकारी दरम्यान गोळी लागून तरुण शिकारी सचिन सुभाष मर्गज याचा जागीच मृत्यू झाला. या प्रकरणी सिप्रियान डॉन्टस (45 रा. कोलगाव, ता. सावंतवाडी) याला सचिन याच्या मृत्यूस कारणीभूत ठरल्याप्रकरणी सावंतवाडी पोलिसांनी अटक केली होती. शनिवारी त्याला येथील न्यायालयात हजर केले असता न्यायालयाने त्याला 9 डिसेंबरपर्यंत पोलिस कोठडी सुनावली. रानडुकराच्या शिकारीसाठी ओवळीयेच्या जंगलात गेले असता झालेल्या दुर्घटनेत वेर्ले-सावंतवाडी येथील सचिन सुभाष मर्गज (28) याचा बंदुकीच्या गोळीने मृत्यू झाला. बंदुकीतील तब्बल सहा छेरे सचिन मर्गज यांच्या अंगात घुसल्याचे शवविच्छेदनात दिसून आले.
सिप्रियान डॉन्टस याला शिकारीचा नाद असल्याने, सचिनने त्याला ओवळीये जंगलात रानडुक्कर असल्याचे सांगितले. सिप्रियान डॉन्टस आपल्या फार्म हाऊसवर ओवळीये येथे जात होता. त्याच्याकडे डबल बॅरल काडतुसची बंदूक होती. त्यानंतर दोघेही ओवळीये जंगलात शिकारीसाठी एकत्र गेले होते.
जनावर समजून गोळीबार
शिकारीदरम्यान सचिन मर्गज जनावर हाकलून बाहेर काढण्यासाठी गेला. तो सिप्रियान डॉन्टस याला स्पष्ट दिसत नव्हता. सचिन रान काढून परत येत असताना एखादे श्वापद येत असल्याचे समजून सिप्रियान डॉन्टसने त्याच्या दिशेने गोळी झाडली. गोळीच्या आवाजाने तेथील लांडोर पक्षी उडून गेला. मात्र गोळीमधील सहाहून अधिक छेरे सचिनच्या छातीत घुसले. गळा आणि मानेवर लागून तो रक्तबंबाळ झाला. गोळी लागताच तो ‘आई गं’ असा ओरडला. तो जखमी झाल्याचे दिसताच सिप्रियान डॉन्टसने गावातील अन्य सहकाऱ्यांना बोलावले. मात्र उपचारादरम्यान त्याची प्राणज्योत मालवली. उपजिल्हा रुग्णालयात आणल्यानंतर डॉक्टरांनी त्यांना मृत घोषित केले.सचिन मर्गज हा सांगेलीत मावस भावासोबत इलेक्ट्रिशियनचे काम करत असे. शुक्रवारी सकाळी 10 वा.च्या सुमारास मोबाईल घरात ठेवूनच मित्रासोबत जातो, असे सांगून घराबाहेर पडला. आपण आज कामावर जाणार नाही, असे त्याने घरी सांगितले. मात्र 1 वा.च्या सुमारास वेर्ले गावात त्याच्या मृत्यूचे वृत्त समजल्यानंतर अनेकांनी सावंतवाडी उपजिल्हा रुग्णालयात धाव घेतली.
फार्म हाऊसमधील कामगाराला गोवण्याचा प्रयत्न
संशयित सिप्रियान डॉन्टस याचे ओवळीये -पारपोली सीमेवर फार्म हाऊस आहे. या फार्म हाऊसमधील कामगाराला या प्रकरणामध्ये तू गोळी चालवली, असे सांगून गोवण्याचा प्रयत्न संशयिताने केला. या महिन्यात ख्रिसमस आहे, त्यामुळे गोळी चालवल्याच आरोप तू स्वतःवर घे, तुला मी यातून सोडवतो, असे संशयित सिप्रियान याने येथील कामगाराला सांगितले व आपण या गुन्ह्यातून सहिसलामत बाहेर पडण्याचा प्रयत्न केला. मात्र जप्त केलेल्या बंदुकीवरील हाताचे ठसे आणि घडलेली घटना याचा मेळ घालत हा प्रयत्न सावंतवाडी पोलिसांनी हाणून पाडला. आरोपीची बंदूकही पोलिसांनी या प्रकरणात जप्त केली आहे.
