दोडामार्ग : सिंधुदुर्ग बँक आपल्या नफ्यातून सहकारी संस्थांच्या सक्षमीकरणासाठी मदत करणार असून, यासाठी बँक आपल्या पाठीशी खंबीर उभी राहील. विशेषतः कोलझर सोसायटीला कार्यालय व सुसज्ज इमारत उभारण्यासाठी सिंधुदुर्ग बँक सहकार्य करेल, असे आश्वासन सिंधुदुर्ग बँक अध्यक्ष मनीष दळवी यांनी दिले.
दोडामार्ग तालुक्यातील नारळ आणि सुपारी या प्रमुख पिकांवर अवलंबून असलेल्या शेकडो कुटुंबांना आधुनिक आणि शास्त्रोक्त मार्गदर्शन मिळावे, या हेतूने कोलझर विभाग विविध कार्यकारी सोसायटीच्या वतीने शेतकरी बागायतदार मेळावा आयोजित करण्यात आला होता. या मेळाव्यात श्री. दळवी बोलत होते. डॉ. विजय दळवी (सहयोगी अधिष्ठाता, उद्यानविद्या महाविद्यालय, मुळदे), डॉ. आर. आर. राठोड, डॉ. एम. एस. शेडगे (सहाय्यक प्राध्यापक, उद्यानविद्या), डॉ. वाय. सी. मुठाळ, दोडामार्ग सहकारी संस्थेचे सहायक निबंध सुजय कदम, बँक संचालक गणपत देसाई, विकास अधिकारी संजय ठाकर व संस्थेचे संचालक उपस्थित होते.
श्री. दळवी म्हणाले, ग्रामीण भागातील सहकारी संस्था सक्षम होण्यासाठी जिल्हा बँक सातत्याने प्रयत्नशील आहे. त्याचबरोबर केंद्र व राज्य सरकारच्या वतीने सहकार वाढविण्यासाठी अनुकूल निर्णय घेतले जात आहेत. याचा लाभ सहकारी संस्थांनी घेऊन शेतकरी सक्षम करण्यासाठी प्रयत्न करावेत.
शास्त्रज्ञांचे मोलाचे मार्गदर्शन
बदलत्या वातावरणामुळे अडचणीत आलेल्या बागायतींना आधुनिक पद्धतीने कस उभारायचं आणि त्यातून आर्थिक उन्नती कशी साधायची, यावर मार्गदर्शन करण्यासाठी कोकण कृषी विद्यापीठाचे शास्त्रज्ञ उपस्थित होते. जिल्हा फळ संशोधन केंद्र, मुळदे येथील शास्त्रज्ञांनी सुपारी आणि नारळ बागायतीची लागवड, उत्पादन वाढीचे तंत्र, खते, बी-बियाणे आणि वनस्पती विकृतीशास्त्र या विविध पैलूंवर शेतकरी व बागायतदारांना मार्गदर्शन केले. मार्गदर्शकांमध्ये (तांत्रिक अधिकारी) यांचा समावेश होता.
मनीष दळवी यांचा सहकार क्षेत्रात केलेल्या भरीव कामगिरीबद्दल तर डॉ. विजय दळवी यांचा उत्कृष्ट शास्त्रज्ञ पुरस्कार मिळाल्याबद्दल सत्कार करण्यात आला. सोसायटीच्या अनेक माजी अध्यक्षांचाही सत्कारही करण्यात आला. मेळाव्याला पंचक्रोशीतील शेतकरी, बागायतदार उपस्थित होते. पत्रकार शिवप्रसाद देसाई यांचाही सत्कार करण्यात आला.
