सावंतवाडी ः सावंतवाडी शहरात एम.एन.जी.एल.च्या माध्यमातून गॅस पाईपलाईन टाकण्याच काम सुरू असून जुनाबाजार होळीचा खुंट येथे चुकीच्या पद्धतीने सुरू असलेल काम तेथील नागरिकांच्या मदतीने नगरसेवक देव्या सूर्याजी यांनी रोखले. युवराज लखमराजे भोंसले यांनी घटनास्थळी दाखल होत यावर मार्ग काढला जाईल. नगराध्यक्षा युवराज्ञी श्रद्धाराजे भोंसले यांच्या कानावर ही बाब घातली आहे. त्यांनी काम सुरू असताना नगरपरिषद कर्मचाऱ्यांनी उपस्थितीत राहावं अशा सुचना केल्या.
जुनाबाजार होळीचा खुंट येथे हे गॅस पाईपलाईनच काम अंतिम टप्प्यात असून श्री. नाईक यांच्या घरासमोर बीएसएनएलचे 14 पाईप भूमीगत आहेत. नियमानुसार गॅस पाईपलाईन 1 मीटर खोल असणं आवश्यक असताना बीएसएनएलच्या पाईपवरून गॅस पाईपलाईन टाकण्यात येत होती. रस्त्याच्या 1 फुटखाली लाईन टाकून नागरिकांच्या जिवीतास धोका निर्माण होत असल्याने हे काम आम्ही रोखल्याचे देव्या सूर्याजी यांनी सांगितले.
ठेकेदार कंपनीने काम करताना योग्य खबरदारी घ्यावी. तसेच नगरपरिषद अधिकारी, कर्मचाऱ्यांच्या उपस्थितीतच ही काम करावे, अशा सुचना त्यांनी केल्या. नगराध्यक्षा युवराज्ञी श्रद्धाराजे भोंसले शहरातील इतर कामांची पाहणी करत असल्याने युवराज लखमराजे भोंसले यांनी घटनास्थळी भेट दिली. बीएसएनएलच्या अधिकाऱ्यांना बोलावून घेत यातून मार्ग काढला. तसेच नगराध्यक्षा श्रद्धाराजे भोंसले यांना याची कल्पना दिली. त्यांनी नगरपरिषद अधिकाऱ्यांना जातीनीशी उपस्थित राहून तसेच कर्मचाऱ्यांच्या उपस्थितीत काम करा, गॅस पाईपलाईन कामात हलगर्जीपणा नको अशा सक्त सुचना दिल्या. यावेळी नगरसेवक देव्या सूर्याजी, बीएसएनलचे अधिकारी, एमएनजीएलचे कर्मचारी, येथील रहीवासी देवेंद्र नाईक, गिरीश नाईक आदी उपस्थित होते.
