मालवण : जिल्ह्यासह मालवण तालुक्यात गेल्या काही दिवसात झालेल्या चोरीच्या घटनांच्या पार्श्वभूमीवर पोलिस निरीक्षक मारुती जगताप यांच्या मार्गदर्शनाखाली मालवण शहर परिसरात नाकाबंदी करत मंगळवारी वाहनांची कसून तपासणी मोहीम राबविण्यात आली.
गेल्या दोन महिन्यांपासून जिल्ह्यात सातत्याने चोरीच्या घटना होत आहेत. मालवणातील काही बंद घरांनाही चोरांनी लक्ष्य केले होते. या पार्श्वभूमीवर प्रत्येक तालुक्यात अचानक नाकाबंदी तपासणी मोहीम राबविण्याच्या सूचना जिल्हा पोलिस अधीक्षकांनी दिल्या आहेत.
त्यानुसार मालवण पोलिस निरीक्षक मारुती जगताप यांच्या मार्गदर्शनाखाली शहरातील देऊळवाडा, कोळंब येथील मुख्य रस्त्यावर नाकाबंदी करून वाहनांची कसून तपासणी करण्यात आली. या तपासणी मोहिमेत पोलिस उपनिरीक्षक प्रतिज्ञा खोत यांसह अन्य अधिकारी कर्मचारी सहभागी झाले होते.
